ZTE Nubia X مواصفات وسعر أول موبايل فى العالم بشاشتين

ZTE Nubia X هوا تقريبا أول موبايل بشاشتين ليهم لازمة أو استخدام فعلى عكس موبايل كان اسمه YotaPhone واللى كان أول موبايل فى العالم يعمل فكرة شاشتين كاملين شاشة من قدام وشاشة من ورا بس مكانش مشهور أوى وكانت ال Specs أو المواصفات بتاعته ضعيفة شوية لكن المرادى معا ZTE Nubia X هوا اول موبايل فعلا بشاشتين ليهم لازمة

الموبايل بييجى بشاشة فى ضهره زيها زى أى شاشة عادية و الفكرة دى جت بسبب المشكلة اللى بتواجهها أى شركة لما بتيجى تنزل موبايل جديد وهيا Screen To Body Ratio واللى عشان يزودو نسبتها لازم يشوفو مكان للكاميرا الامامية

 وكان فيه حلول للمشكلة ديه زى وجود نوتش فى الشاشة محطوط فيه السماعات و الكاميرا الأمامية وبعدين الفكرة اتطورت وبقت النوتش الصغيرة أو ال Waterdrop Notch وبعدين جت فكرة عمل خرم فى الشاشة صغير يكون محفور فيه الكاميرا الأمامية وشفنا الفكرة ديه فى ال Honor View 20 وبعد كده كان فيه حل تانى

 زى ال POP Up Slider زى ما شفنا فيه Lenovo Z5 Pro واللى كان بييجى بنسبة استحواذ للشاشة بتصل ل 95% وديه أعلى نسبة لحد دلوقتى ولكن طبعا كان ليه عيوب كتير اتكلمنا عنها أما دلوقتى ZTE Nubia X قدم حل جديد جدا وهوا وجود شاشة فى ضهر الموبايل والاستغناء عن الكاميرا السيلفى و استخدام الكاميرا الخلفية كسيلفى بدلها طبعا معا 

وجود كل الخواص اللى فى الكاميرا الخلفية زى الPortrait و ال Focus والجودة الأعلى طبعا من الكاميرا الأمامية وكمان هيكون فى استخدامات كتير للشاشة التانية مش للتصوير بس وبصراحة ديه فكرة رهيبة جداا و أول مرة نشوفها وليها مميزات كتير جدا والنهاردة هنتكلم عن كل مميزات الموبايل ده

الشاشة الأمامية هيا أقرب شاشة لل Oppo Find X بنسبة استحواذ للشاشة بتوصل ل 93.5% واللى بتوصل نسبة الاستحواذ فى الأوببو ل 93.8% 

نوع الشاشة LPS Lcd بحجم 6.3 انش Full HD Plus وبResloution 2280X1080 بيكسل وبكثافة 403 بيكسل لكل انش أما الشاشة الاضافية اللى فى الضهر بتكون 

بحجم أصغر شوية 5 انش OLED بدقة 720X1520 بيكسل والشاشتين عليهم طبقة حماية من نوع Gorilla Glass 3

البصمة هيا تانى أروش حاجة فى الموبايل ده واللى مكانها جاى فى الجنب وهوا أصلا المكان الطبيعى لصباعك ومجرد ما تلمسه بسهولة الموبايل بيفتح ومش هيبقى فى أى صعوبة خالص مجرد لمسة لجنب الموبايل أما بقا لو حابب تنقل 

للشاشة الخلفية وتقلب الموبايل فمش هتحتاج انك تلف صباعك اللى بتستخدمه فى البصمة لنفس المكان لأ هتحط صباعك مثلا لو اليمين عادى على الجنب اليمين للموبايل وهيفتح معاك

 وبكده يبقى فيه بصمتين للموبايل بصمة على كل جنب ومش هتحتاج تلف ايدك عشان تفتحه وكمان سرعة الفتح عالية جدا وكمان ينفع تخليه الزرار من الجنب تخليه Back أو Home على حسب ما تحب 

السوفت وير بقا بتاع الموبايل سلس جدا وواجهة النظام عكس الموجودة فى Lenovo Z5 Pro خالص يعنى هتلاقيه سريع جدا الوجهة هنا بصراحة خفيفة وسلسة جدا التنقل سهل خالص وكمان هتلاقى ال Notification Bar من تحت مش من فوق واللى هيكون عملى أكتر خصوصا ان الشاشة كبيرة وصعب تنزله من فوق بأيد واحدة لازم ايديك الاتنين وديه بس ميزة صغيرة من مميزات واجهة النظام الكتير جدا

غير كده الموبايل فيه عتاد داخلى قوى جدا وبيديك أداء عالى وتجربة ألعاب مميزة جدا زى 

معالج Snapdragon845 واللى يعتبر أقوى معالج موجود فى Snapdragon لحد دلوقتى لحد ما ينزل 855 وكمان أدائه قوى ومبيهنجش أو يعلق خالص و المعالج الرسومى Adreno630 وهتاخد تجربة ألعاب ممتازة وال Multi Tasking هيشتغل كويس وتقدر تفتح كذا تطبيق من غير تهنيج 

كمان نسختين من  الرامات 6 جيجا بايت أو 8 جيجا بايت و نسختين من الذاكرة الداخلية
الأولى 128 جيجا بايت و التانية 256 جيجا بايت فبصراحة مش هتحتاج حاجة تانية الموبايل بيديك مواصفات داخلية حلوة جدا وطبعا باين عليه انه فلاج شيب محترم

غير طبعا تصميمه الجذاب جدا و ضهره القزاز اللى بيلمع معاك معا وجود شكل جميل بيدى اضاءة فى الضهر وألوانه الجميلة جدا زى الذهبى المزرق و الاسود و الرمادى الغامق 

كمان البطارية اللى سعتها 3800 وبتدعم الشحن السريع ومنفذ شحن USB Type C
واللى ممكن تفتكر انها قليلة خصوصا ان فيه شاشتين ولكن 

الحقيقة ان الشاشتين مش بيشتغلو معا بعض وكمان الشاشة اللى فى الضهر بتستهلك أقل خصوصا انها OLED وحجمها أٌصغر ولو استعملتها هيا بس هتوفر كتير ف البطارية بس عموما أداء البطارية حلو جدا

الكاميرا الخلفية مزدوجة الأولى 16 ميجا بيكسل بفتحة عدسة F1.8 و التانية 24 ميجا بيكسل بفتحة عدسة F1.7 وبتيجى بخاصية ال HDR وبتصور فيديو لحد 2160p وطبعا

 زى ما قلنا مفيش كاميرا أمامية والكاميرا الخلفية هنستخدمها فى التصوير العادى و السيلفى واللى هتبقى أفضل من وجود كاميرا أمامية بسبب وجود خواص وميزات كتير مبتبقاش موجودة فى الكاميرا الأمامية 

بس العيب الوحيد ان فى فئة سعر الموبايل فى كاميرات أحسن بكتير من الكاميرا ديه رغم انها الى حد ما كويسة ولكن هتلاحظ ان أدائها حلو فى السيلفى أكتر من التصوير العادى وهتديك عزل هايل فى السيلفى وجودة صورة عالية وكمان بالليل هتبقى كويسة جدا

 بالنسبة لفكرة الشاشتين هل تعتبر فكرة حلوة ؟؟ 

وبصراحة هنتكلم فى الموضوع ده من وجهتين نظر

 الأولى هيا الشكل الروش و الجديد وديه طبعا وجهة نظر صحيحة جدا خصوصا وجود Animation جميل جدا بيفضل يتحرك فى ضهر الموبايل وممكن تغيره براحتك كمان فكرة وجود شاشتين تعتبر فكرة مبهرة فى حد ذاتها يعنى بصراحة من ناحية الشكل نقدر نقول ان الفكرة ديه ناجحة جدا

اما من وجهة النظر التانية هيا الناحية العملية هنلاقى ان لما تيجى تقلب مابين الشاشتين هتدوس على الجنبين معا بعض وتقلب الموبايل بس كده ومبتعلقش خالص وبتقل بسرعة جدا كمان ينفع تفتح تطبيقين يعنى مثلا لو انتا فاتع يوتيوب فى الشاشة الاصلية ممكن تفتح فيسبوك فى الشاشة التانية عادى وممكن تقلب ما بينهم وعادى تشغل تطبيقين

وبالنسبة بقا للى بيحبو الألعاب و بالذات لعبة Pubg هتلاقى حركة حلوة جدا وهيا انك ممكن وانتا بتلعب على الشاشة الرئيسية تستخدم الشاشة الخلفية ك Controller أو زرارين يعنى مثلا لو بتلعب عادى هتلاقى ان نص الشاشة اللى ورا 

مقسوم Right و Left فلو بتلعب ممكن تختار فين اليمين وفين الشمال يعنى ممكن تخلى اليمين لل Fire و الشمال لل Zoom أو العكس براحتك فتعتبر حركة حلوة وهتساعدك جدا ومش هتحتاج تشترى أجهزة تحكم اضافية للعبة ممكن عادى تلعب على الشاشة العادية وبتضرب وتكبر من لمسة عل ضهر الموبايل بصراحة الموضوع ممتع جدا

الموبايل فكرته جديدة ورهيبة جدا ومفيهوش غير عيب واحد هوا الحماية عشان يكون صعب تركبله جراب بسبب وجود شاشة ورا وصعب تلاقى اسكرين للضهر بس هوا جاى أصلا باسكرين كويس من البلاستيك بيمنع الخدوش فلازم بصراحة لو هتجيب الموبايل ده تخلى بالك جدا لأنه ملوش حماية وأى وقعة ممكن تبوظ الشاشة

وأخيرا سعر الموبايل من أول 500 دولار لحد 550 دولار على حسب النسخة بتاعة الذاكرة الداخلية وهوا مش موجود فى مصر وممكن مينزلش بس ممكن تجيبه عادى من بره مصر و بصراحة الموبايل فكرته جديده ويستاهل انك تجيبه وهيقدم تجربة ممتعة