أخيرا ظهر موبايل شاومى الجبار Redmi K20 Pro و اللى رغم كل انبهاراته و مميزاته الا انه مش هينزل مصر للأسف و النسخة اللى هتكون متاحة هيا النسخة العادية Redmi K20 و ده كلام شبه مؤكد و ممكن ينزل بأسم Mi 9T
الموبايل اتكلمنا عنه قبل كده بالتفصيل و لو حابب تعرف كل مواصفاته من هنا
مبدأيا كده و قبل ما نتكلم عن أى حاجة لازم تكون متأكد ان الموبايل هيعجبك و كفاية بس منظر الضهر اللى مجرد ما هتحرك الموبايل هتلاقى فيه خطوط بتتحرك بألوان مبهرة جدا و بشكل جديد هتعجبك أكيد أكتر من فكرة اللونين المتدرجيناللى داخلين فى بعض اللى شفناها كتير
و كمان على حسب الضوء هتتغير الألوان و ممكن يديك لون أخضر وبنفسجى و أزرق غامق ده فى حالة لو اللون الأساسى أزرق أما لو اللون الأساسى أحمر يبقى بلاش تسأل عن الألوان لأنك هتشوف حاجة خيال
نسيبنا من الضهر بقا و نروح للشاشة اللى هنلاقيها طبعا كاملة بأكبر استغلال للحواف و أكبر و طبعا الكاميرا هتبقى فى موتور هيطلع و ينزل و أكيد اللى هيعجبك من أول نظرة هيا اللمبة اللى بتنور معا طلوع الموتور ونزوله و اللى كمان بتعمل صوت لطيف جدا وممكن تغيره زى منتا عايز وكمان ممكن تخليها من غير صوت و طبعا اللمبة ديه بتنور على حسب لون الموبايل يعنى لو اللون أحمر يبقى اللمبة هتنور أحمر وهكذا
و خاصية ال Face Unlock شغالة هنا بصورة ممتازة
و من أهم مميزات الكاميرا اللى فى الموتور هيا جزئية الأمان يعنى لو الكاميرا مفتوحة و الموبايل اتحرك بسرعة هتتقفل لوحدها وده مفيد جدا علشان متتكسرش لو الموبايل وقع
و طبعا أهم حاجة فى الموبايل ده هيا الشاشة الكاملة ال Super Amoled و اللى طبعا أول ما تسمع الكلمة ديه لازم ييجى فى بالك 3 حاجات ال Dark Mode و Always On Display و البصمة فى الشاشة
و البصمة هنا اتطورت بصورة كبيرة و ده لأنها من الجيل السابع و نقدر نعتمد عليها بشكل كامل
و بالنسبة للأداء أكيد بمجرد ما نقول Snapdragon 855 يبقى الموبايل ده جاى بأعلى أداء ممكن و مش بس كده لأ كمان الموبايل ده هوا أرخص موبايل فى العالم بييجى بالمعالج ده بسعر 360 دولار يعنى 6000 جنيه لمعالج هوا الأقوى فى معالجات أندرويد يعنى الموبايل ده نازل علشان يدمر أجهزة الفلاج شيب
و طبعا مش محتاجين نتكلم عن الأداء تانى لأن Snapdragon 855 معناها ان الموبايل هيطير خلاص
الكاميرا بقا أقل كلمة عنها انها ممتازة مش ناقص فيها غير ان يكون فى OIS فى أى كاميرا من التلاتة و ده علشان ثبات الفيديو يكون أحسن
بس الجودة ممتازة خصوصا الكاميرا ال 48 ميجا بيكسل بفتحة عدسة F1.7 ممتازة خصوصا بالليل
و الكاميرا ال Wide Angle هنا أكبر الموجودة فى موبايل أغلى زى ال MI 9 و طبعا هتقدر تجيبلك حاجات أكتر فى الصورة و تفاصيل أكتر فى الصورة
بس مشكلتها الوحيدة و ديه تقريبا مشكلة معظم الشركات انها مبتركزش على فتحة العدسة فى الكاميرا ال Wide Angle و بتكون غالبا F2.2 أو F2.4 و المفروض ان فتحة العدسة تكون أرقامها أقل من كده علشان تقدر تصور بيها بالليل و لكن للأسف الموضوع ده ما اتحلش فى الموبايل
و الكاميرا السيلفى 20 ميجا بيكسل بفتحة عدسة F2.2 و هتديك صور فوق الممتازة بألوان جميلة جدا وتفاصيل رهيبة
البطارية هنا بقا 4000 ميللى أمبير و طبعا ديه سعة كبيرة وممتازة جدا و أحسن من الموجودة فى ال Mi 9 و طبعا معا وجود الشحن السريع بقدرة 27W معا منفذ الشحن Type C
و كمان الموبايل ده بيعوضك عن كل اللى كان ناقص فى ال Mi 9 زى طبعا حجم البطارية وكمان عدم وجود مدخل سماعات 3.5 ميللى اللى رجع تانى فى K20 Pro
الحاجة الوحيدة بس اللى هتفرق هنا هو مكان كارت الميمورى اللى مش موجود و رغم ان ذاكرة تخزين الموبايل الداخلية بتبدأ من 64 جيجا بايت لحد 256 جيجا بايت الا ان 64 جيجا هيبقى عيب كبير للموبايل ده لأنك كده لو خلصت المساحة ديه مش هيبقى فيه عندك أى حل لأن مفيش كارت ميمورى و دلوقتى حجم التطبيقات و التحديثات بقى كبير جدا و هتخلص المساحة بسرعة
على العموم اللى كان من اهتماماته الأداء و الكاميرا و نفسه يجيب الموبايل ده ف ال Mi 9 هيقدمله تجربه قريبة و تقريبا ال Mi 9 هيديك أداء مماثل ولو مكانش أحسن و يعتبر بديل مناسب ليه و ده فى حالة لو أن الموبايل ده مش هينزل مصر