الموبايل ده يعتبر من أقوى الموبايلات اللى نزلت فى 2019 وده مش علشان امكانياته الجبارة مثل أو انه فلاج شيب و لكن علشان هوا من أرخص الموبايلات الموجودة اللى ممكن تقدملك تجربة استخدام كويسة جدا من غير ما تضطر تشترى موبايل قوى ويكون سعره غالى يعنى بمعنى تانى 2100 هيقدمولك المواصفات المناسبة اللى هتحتاجها فى أى موبايل
بالنسبة لمواصفات الجهاز بالكامل هتلاقى مراجعة كاملة ليه هنا
مش عايزين نكون ظالمين للموبايل فى تقييمنا ليه فى الفئة السعرية بتاعته اللى بتكون موبايلاتها كلها بمعالجات رباعية و شكلها وحش أما Realme C1 فبييجى بتصميم من ضهر بلاستيك مستوى من كذا طبقةعلشان يدى ايحاء انه زجاج
و من قدام شاشة الموبايل حجمها الأكبر فى فئتها 6.2 انش بأعلى نسبة استحواذ و بأقل حواف و في نوتش للكاميرا الأمامية و حجم الشاشة المحترم ده معا الحواف بيجسسك انك قدام موبايل من فئة سعرية أعلى بكتير من 2000 جنيه
الخلاصة انه نفس شكل ال Oppo F7 بس من غير مستشعر بصمة
الموبايل بييجى بمعالج ثمانى النواة Snapdragon 450 و ده اللى بيخليه الموبايل الوحيد فى فئته بمعالج ثمانى و أداءه الأفضل فى الفئة و مش هيهنج معاك و لكن كون الموبايل ب 2 جيجا بايت فقط معا واجهة أوببو Color OS الموبايل بالعافية بيحتفظ ببرنامجين فى الخلفية و معا البرنامج التالت هتلاقى ان الموبايل لازم يعمل اعادة تحميل للبرنامج ده من الأول
بمعنى أخر ان الموبايل ده مش لل Multitasking و معا ذلك ده ما يعتبرش عيب قاتل للموبايل خصوصا انه ب 2000 جنيه
و هنستفيد بالمعالج الثمانى النواة ان حتى لما البرنامج بيعمل اعادة تحميل التأخير بيكون حوالى ثانيتين
و ال Realme C1 داعم لخاصية قسم الشاشة نصين و استخدام برنامجين فى نفس الوقت وكمان استخدام الرسوم بدل الزراير الافتراضية و بتشتغل بكفاءة معقولة
الحاجة الوحيدة اللى مش موجودة فى السوفت وير هو امكانية نسخ التطبيقات زى مثلا امكانية انك تعمل تطبيقين واتساب و تخصص تطبيق لكل شريحة اتصال
فى عادة سيئة من ريلمى و أوببو و هيا اختفاء لمبة الاشعارات و للأسف الشركة تمسكت بالعادة ديه فى ال Realme C1
أما بالنسبة للذاكرة فالموبايل ذاكرته الداخلية 16 جيجا بايت و بيكون متاح منها للمستخدم بعد تنزيل تطبيقات لتواصل الأجتماعى الأساسية و تنزيل لعبة Pubg باعتبارها حاجة أساسية دلوقتى هتلاقى ان معاك 4 جيجا بايت بس
لكن من الكويس وجود منفذ مخصص لكارت ميمورى علشان تزود مساحة التخزين بس للأسف مش هتقدر تنقل عليه التطبيقات وهيكون لتخزين أى ملفات انتا محتاجها فقط
أداء الألعاب كويس جدا و خصوصا لعبة Pubg اللى بيكون أداءها معقول و تقدر تلعبها لفترات طويلة على جرافيكس Low أو Ballanced بأقل سقوط للفريمات
نروح للكاميرات و تحديدا الكاميرا الأمامية اللى بتكون 5 ميجا بيكسل و الحلو فيها وجود خاصية ال HDR و خاصية العزل اللى مش بنشوفهم فى الفئة السعرية الأقتصادية
صور السيلفى بالموبايل تفاصيلها قليلة طبعا لما تعمل زووم للصورة
أما الكاميرا الخلفية فهما 2 أساسية 13 ميجا بيكسل بفتحة عدسة F2.2 و كاميرا مساعدة 2 ميجا بيكسل لصور العزل
ألوان الصور جميلة و حتى فى الاضاءة الليلية هتتفاجىء ان الموبايل بيقدر يطلع صور محترمة و معقولة و لكن برضه تفاصيل الصور لما تعمل زووم بتبقى قليلة
الموبايل بيدعم مستشعر البوصلة و فيه جايرسكوب سوفت وير و بيدعم USB OTG و Radio FM
و زى ما قلنا الموبايل مفيهوش مستشعر بصمة و لكن فيه ميزة التعرف على الوجه ساعات بتكون سريعة و ساعات بتتأخر فى الفتح و فى الضلمة التامة ممكن ما تفتحش و فى الحالة ديه هتتضطر تدخل الباسورد بتاعك
أخيرا أهم نقط قوة الموبايل ده هيا البطارية و اللى بتكون بسعة 4230 ميللى أمبير و اللى تعتبر أكبر بطارية فى الفئة و ممكن تفضل معاك لحد يومين استخدام من غير شحن و ممكن تكمل 10 ساعات استخدام فعلى للشاشة
أما بالنسبة للشحن ف طبعا الموبايل غير داعم للشحن السريع و بيشحن فى حوالى ساعتين ونص
ال Realme C1 بيقدم للشخص اللى بيشترى موبايل و ممعهوش غير 2000 جنيه حاجات كان مستحيل ياخدها فى الفئة السعرية ديه زى الخامات اللى من براند محترم و الشاشة الكبيرة بحواف قليلة و البطارية الجبارة و الأداء اللى يعتبر أفضل من المنافسين