Asus Zenfone 6
أكيد مفيش حد بيحب ال Bezels أو الحواف الموجودة حول الشاشة بس هيا تعتبر مفيدة الى حد ما بالنسبة لشركات الأجهزة المحمولة لأن ممكن تحط فيها السماعات و الكاميرا و الفلاش مثلا لكن الاتجاه السائد دلوقتى أو التريند ان ميبقاش فيه حواف خالص ومحاولة تحقيق أكبر نسبة Screen to Body Ratio وشفنا طرق كتير للتماشى معا التريند ده زى النوتش العادية اللى اتقدمت فى IPhone XS Max وبعد كده اتطورت ل Water Drop Notch اللى بقت فى أغلب الاجهزة زى Redmi Y3 مثلا وكمان شفنا ال Infinity O Display أو الخرم فى الشاشة زى اللى في Honor View 20 وكمان شفنا فكرة رهيبة جدا زى وجود شاشة تانية فى ضهر الموبايل نقدر نستخدمها معا الكاميرا الخلفية فى التصوير السيلفى ونستغنى عن الكاميرا الأمامية وشفنا الفكرة ديه فى ZTE Nubia X وأخر فكرة شفناها فى التريند ده هيا ال Pop-Up Camera أو السلايدر وهوا الجزء الزيادة اللى بينزلق من الموبايل وبيكون فيه الكاميرا الأمامية و السماعات وبيكون أوتوماتيك عن طريق وجود موتور خاص ببالجزء ده زى ما شفنا فى Oppo F11 Pro أو ممكن يكون سلايدر يدوى زى اللى فى Lenovo Z5 Pro
نروح بقا لشركة Asus اللى قررت انها تاخد فكرة السلايدر اليدوى لأعلى من كده كمان وبعد أيام قليلة وتحديدا يوم 16 مايو الشركة بتستعد انها تعلن عن موبايل جديد باسم Zenfone 6 والموبايل ده هييجى معا سلايدر ولكن هيكون Double Slider أو سلايدر مزدوج ومن فترة طويلة كنا شفنا Concepts للموبايل ده وواضح ان Asus متجهة فعلا لهذا الاتجاه
سلايدر مزدوج بدل ما تعمل سلايد لتحت بس عشان تقدر تستخدم الكاميرا الأمامية لأ تقدر تعمل كمان سلايد لفوق عشان تكشف عن سماعات أو Options اضافية للكاميرا
الفكرة ممكن تكون مستوحاة من موبايلات نوكيا القديمة جدا اللى كان فيها سلايدر شبه كده بس التطور هنا ان طالما ممكن أستخدم المساحة اللى فوق فى الكاميرا الأمامية ليه ميبقاش فيه سلايدر تحت كمان ونحط حاجات فوق وحاجات تحت
و الطبيعى أكيد ان Zenfone هييجى من غير أى نوتش أو أى فتحة فى الشاشة للكاميرا الأمامية عشان الكاميرا هنا هتكون موجودة فى الجزء العلوى فى السلايدر و احتمال يكون معاه كذا فلاش عشان يكون مفيد طبعا فى التصوير فى الاضاء المنخفضة
لكن طبعا الجزء المثير هنا هوا الجزء السفلى اللى شفنا حسب بعض التسريبات ان هوا مخبى سماعة كبير جدا السماعة ديه طبعا Front Facing ويكون أحسن وأحسن لو تشتغل معا سماعة المكالمات عشان تديك صوت ستيريو
فمعنى كده ان وقت ما تكون حابب تتفرج على فيديوهات أو تلعب ألعاب هتسلايد الموبايل لفوق ويظهر عندك سماعة تديك صوت أقوى بكتير من السماعة الموجودة فى الجزء السفلى من الموبايل بس أكيد برضه الموبايل هيحتاج فتحة للسماعات فى الجزء السفلى عشان يطلع الصوت وانتا مش فاتح السلايدر عشان متضطرش تفتح السلايدر كل مرة تحتاج تسمع حاجة
بصراحة الفكرة هايلة جدا وتعتبر استغلال مثالى للمساحة وطالما كده كده فيه سلايدر تبقى فكرة السلايدر المزدوج أفضل بكتير
وعلى فكرة باقى مواصفات ال Zenfone 6 تعتبر قوية جدا وتليق بموبايل فلاج شيب
شركة Asus نزلت صورة من فترة على تويتر بتوضح ان الموبايل هييجى معا Snapdragon 855 بتكنولوجيا 7 نانو اللى هتخفض استهلاك البطارية لأقصى درجة ممكنة ويعتبر أقوى معالج لأجهزة Android
كمان الموبايل هيحتوى على 3 منافذ للشرائح 2 منهم لل SIM و المنفذ التالت بيكون لكار الذاكرة الخارجى
وكمان الموبايل هيحتوى على مدخل 3.5 ميللى للسماعات
وحسب التلميحات اللى من الشركة كمان الكامرتين اللى فى الضهر واحدة منهم هتكون 48 ميجا بيكسل و التانية 13 ميجا بيكسل
و المفروض ان الموبايل هييجى معا بطارية عملاقة 5000 ميللى أمبير وكمان التسريبات بتقول انه هيدعم خاصية الشحن السريع
بصراحة موبايلات Asus مش من أشهر الأجهزة ولكنها بتقدم منتجات متميزة جدا ودايما مواصفاتها قوية وفيها ميزة تنافسية وبنتوقع ان معا نزول امواصفات الكاملة للموبايل انه هينافس الموبايلات الفلاج شيب الموجودة بشدة وفى يوم 16 مايو هيتم الاعلان عن الموبايل بشكل رسمى وانتظروا مننا المراجعة الكاملة للموبايل