هنتكلم النهاردة عن Vivo Nex 2 أو Vivo Nex Dual Display تانى موبايل ينزل بشاشة تانية لحد دلوقتى بعد موبايل ZTE Nubia X بس الاختلاف ان المرادى Vivo خدت موضوع الشاشة ده لمستوى تانى والنهاردة هنتكلم عن كل مميزات الموبايل الجديد
طبعا الهدف الاساسى من وجود شاشة تانية هوا الغاء وجود الكاميرا الامامية و الاعتماد الكلى على الكاميرا الخلفية بضغطة زرار مخصوص تقدر تقلب ما بين الشاشة الأمامية و الشاشة الخلفية وممكن تتصور سيلفى من الكاميرا الخلفية بس طبعا فيه اضافات جديدة ومميزات كتيرة واللى هنتكلم عنها بالتفصيل
شاشتين من نوع AMoled على عكس ال ZTE Nubia X اللى كان الشاشة الاولى LCD والتانية Amoled وكمان شركة فيفو اعلنت ان نسبة استحواذ الشاشة من حجم الموبايل هتوصل ل91%
الشاشة الاولى 6.4 انش Super Amoled بدقة 1080X2340 بيكسل وبكثافة 403 بيكسل لكل انش
الشاشة التانية أصغر شوية 5.5 انش Super Amoled بدقة 1080X1920
الكاميرات الخلفية 3 كاميرات موجودين فوق الشاشة الخلفية الكاميرا الأساسية 12 ميجا بيكسل بفتحة عدسة F1.8 فيها مانع اهتزاز بصرى
الكاميرا التانية 2 ميجا بيكسل بفتحة عدسة F1.8 ومخصصة لحسابات العمق و الPortrait
الكاميرا التالتة متعتبرش كاميرا بس تعتبر 3D Sensor فتحة العدسة فيها F1.3 بس زى ما قلنا هيا مش مخصصة للتصوير بشكل أساسى هيا مخصصة للFace 3D Unlock بشكل أساسى وحاجات تانية كتير
الكاميرا ديه بتشتغل على أساس تكنولوجيا اسمها TOF أو Time OF Flight تقدر على أساسها تقيس المسافات أو الابعاد ةتقدر ترسم خريطة 3D بالكامل لوشك أو لأى حاجة تانية وكمان السينسور ده هيكون هو المسئول عن انك تعمل Unlock للجهاز وانتا ماسك الموبايل من الشاشة الخلفية و قبل كده فيفو كانت عرضت تقنية TOF فى الصين وقالت انها أفضل و أسرع من الموجودة فى أيفون 10 والمفروض انها بتعتمد على أكتر من 300 ألف نقطة قياس لأبعاد ال3D للوش
وعن طريق الكاميرا ديه تقدر تعمل ال Beauty Mode بشكل متطور وتقدر تعمل حاجة كمان شبه ال Animojis ولكن عن طريق Scan صورة حقيقية لوشك تقدر تلفها وتحركها او تركبها على حاجات تانية
بالنسبة للشاشة الثانوية تقدر تستخدمها كأنها شاشة أساسية ولكن طبعا وجود شاشة اضافية بيديك الحرية انك تعمل أفكار جديدة
زى مثلا ان الشاشة الاساسية تستخدمها فى Application والشاشة التانية تستخدمها فى Application تانى وديه حاجة كويسة جدا
والأستخدام التانى هيكون فى السيلفى طبعا انك ممكن تتصور بالكاميرا الخلفية وانتا فاتح الشاشة الخلفية وتقدر تشوف نفسك عادى كأنها أمامية وكمان هيبقى فيه خاصية ال Mirror Mode واللى بيخلى الشاشة الخلفية مفتوحة وبتعرض اى حاجة انتا بتصورها زى مثلا لو حبيت تصور حد ممكن يشوف شكله فى الشاشة وانتا بتصوره وده برضه تتطور كبير فى التصوير
كمان نفس الفكرة اللى قلناها فى Nubia X انك تقدر تستخدم الشاشة الخلفية معا ال Games كأنها زراير اضافية معا الزراير الموجودة على الشاشة الرئيسية وديه طبعا بتكون حاجة مفيدة فى كتير من الألعاب
المواصفات الداخلية لل Vivo Nex 2 برضه رهيبة و اللى هتبين ان الموبايل فلاج شيب محترم مش بس شاشتين
المعالج Snapdragon 845 للأسف اتصنع قبل نزول Snapdragon 855 ومعالج رسومى Adreno 630
و الرامات 10 جيجا بايت وده رقم طبعا خيالى و الذاكرة الداخلية 128 جيجا بايت
تقدر تستخدم 2 SIM Card او شريحة واحدة معا كارت ميمورى
البطارية بسعة 3500 ميللى أمبير بتدعم خاصية الشحن السريع
وهييجى بنظام Android 9 Pie بواجهة نظام Funtouch 4.5
وكمان الموبايل مازال محتفظ بمدخل سماعات 3.5 وديه حاجة كويسة
ومن المميزات الاضافية فى Vivo Nex Dual Display وجود حاجة جديدة فى ضهر الموبايل مشفناهاش قبل كده وهبا
حلقة دائرية نصها جوا الشاشة والنص التانى فوق الشاشة الخلفية والحلقة ديه بتحتوى على كامرتين من ال3 كاميرات اللى اتكلمنا عنهم
والحلقة ديه بتشتغل كأنها LED Light وتقدر تخليها تنور ألوان RgP بأى لون انتا عايزه ممكن مثلا تنور معا الاشعارات أو طول الوقت زى منتا عايز
وكمان على حروف الحلقة ديه 2 فلاش عشان شتغلو كضوء قوى للكاميرا لو هتصور فيديو لنفسك او حاجة زى كده
و فيفو بتسمى الحلقة ديه Lunar Ring أو الحلقة القمرية
و بالنسبة للطرق اللى ممكن تقتح بيها الموبايل هنلاقى ان على عكس ال Nubia X اللى كان بيفتح باستخدام مستشعرين بصمة فى جنبين الموبايل هنا الموضوع مختلف يعنى لو انتا ماسك الموبايل فى حالة عادية و بتستخدم الشاشة الكبيرة هتلاقى عندك بصمة فى الشاشة ولو ماسك الموبايل من الشاشة الصغيرة مش هتحتاج ترجع للشاشة الرئيسية لأ كل اللى هتعمله انك تستخدم ال3D Sensor اللى فى الكاميرا التالتة عشان يتعرف على وجهك و يفتح معاك
سعر الموبايل تقريبا 730 دولار ومش عارفين امتى هيكون متاح خارج الصين
وبصراحة الموبايل رغم ان ZTE Nubia X كان أول موبايل بالفكرة ديه الا ان Vivo Nex Dual Display قدر يتفوق عليه ويثبت انه متطور أكتر