Oppo A5s
الموبايل كويس جدا و كل حاجة وشكله جميل و مواصفقاته معقولة بس فيه مشاكل حواليه غريبة و خصوصا انه يعتبر موبايل كده ملوش موقع من الاعراب لا هوا غالى ولا هوا رخيص يعنى مواصفاته لو زودت شوية و جيت على نفسك شوية هتاخد حاجة أحسن و فى نفس الوقت لو روحت اشتريته هتقول منا كنت ممكن أخد نفس المواصفات ديه بسعر أقل فبصراحة الموبايل ده تركيبة غريبة كده
بس عموما زيه زى ال A3s هيبيع و هيحقق نجاح كبير جدا و ال A3s لحد دلوقتى بيحقق نجاح كبير جدا فنتوقع ان الموبايل ده هيبقى ليه نفس الدور وده علشان أوببو نوعا ما مبتنزلش غير موبايل فى السنة اللى هوا ال F9 ال F7 ال F11 و هما دول اللى بياخدوا الشو تقريبا و كل أنظار الناس و اللى بيشوف اعلانات بيشوف الموبايلات ديه
بس فيه حاجات كده من تحت لتحت اللى مش معروفة أوى زى ال E83 و A3s و ال A5s و ال A7 و ديه موبايلات نوعا ما أقل شوية و مش عليها نفس الصيت بتاع ال F11 و ال F9 و مش مركزين عليها أوى بس اللى ببقا عايز أوببو ومعهوش فلوس ال F9 و ال F11 و عايز نفس الشكل ب 2700 جنيه بس فمفيش قدامه غير ال A5s
الحاجة المميزة فى الموبايل هيا ال Build Quality واللى تعتبر أغلى من تمنه
الموبايل فعلا مديك جودة و خامات حلوة و حتى مسكته حلوة و خصوصا الجناب ديه اللى لو لمستها هتلاقيها ناشفة وهتحس انها مش بلاستيك و انها معدن على عكس ال A3s اللى كان كله بلاستيك فى بلاستيك
و طبعا الضهر ده نسخة من ضهر F9 و ده اللى هيخلى الناس لما تروح تشترى الموبايل تحس انه نفس الشكل يعنى ممكن لو شوفته تفتكره ال F9 مثلا لكنه بعيد تماما عن مواصفاته
شاشة الموبايل مفيهاش أى حاجة تميزها بس مفيهاش عيوب يعنى الى حد ما متوسطة لا هيا مميزة أوى نتكلم عن ميزاتها ولا عيوبها باينة علشان نتكلم عنها و نقدر نقول عنها ان ألوانها جميلة جدا و ال Quality 720 تقريبا الفئة ديه كلها 720 و مش هتلاقى حاجة أحسن منها فى الفئة ديه لا فى الحواف ولا فى الجودة
و كمان المفاجئ فى الموبايل و الكويس جدا هو وجود مستشعر البصمة فى الضهر اللى كان غايب فى ال Realme C1 و ال A3s و طبعا سرعة البصمة ممتازة ونفس الكلام فى ال Face Unlock
الموبايل بييجى بمعالج مش جديد اوى Meditek P35 و الغريب واللى شفناه من كذا شركة انهم بينزلوا النسخة بمعالج أضعف
بس بغض النظر عن المعالج الموبايل كأداء كويس جدا وبيشغل ببجى على الاعدادات ال Low من غير أى مشاكل و طبيقات السوشيال ميديا ممتازة جدا على الموبايل ده
البطارية هنا بقا اللى كويسة جدا 4230 و اللى طبعا أدائها ممتاز بس أوحش حاجة فيها هيا سرعة الشحن لأن الموبايل ممكن يدخل فى أكتر من 3 ساعات علشان يشحن بس الكويس انك لو استخدمته من أول اليوم و هوا 100% هيكفيك ومش هتحتاج تشحنه
تانى حاجة تشفع للموبايل بعد البطارية و خامات الصنع هيا الكاميرات اللى فعلا أوببو بتتميز فيها و اللى هنا هتكون 13 ميجا بايت و 2 ميجا بايت و الأمامية 8 ميجا بايت و الصراحة فيه أقوى و لو زودت شوية هتاخد حاجات أقوى بس لو عايز حاجة بمبلغ 2700 جنيه هتلاقى ان الكاميرات كويسة جدا وخصوصا بالليل
نتكلم بقا بصراحة عن الموبايل اللى يعتبر نازل فى الوقت الغلط لأن دلوقتى المنافسة شرسة أوى و ال Note 7 ابتدى واحدة واحدة يظهر ويرجع للصورة و كمان ال Realme 3 كويس جدا وعندك برضه Infinix S4 بينافس بقوة فى السعر ده فطبعا الموبايل فى الفئة السعرية ديه مش هوا الأختيار الأول فى ظل وجود منافسين كتير لكن لو قررت انك تشتري الموبايل ب 2700 يبقى اختيار كويس بالنسبالك