أول موبايل فى العالم بكاميرا أمامية مخفية فى الشاشة
أوببو أعلنت على تويتر عن أول موبايل بكاميرا خفية جوه الشاشة فى العالم وكان فيه فيديو بيوضح كده وبعدها على طول شاومى عملت نفس الموضوع بفيديو جودته أعلى شوية
Descriptions
من سنين طويلة و الشركات كلها بتحاول توصل شكل الموبايلات لأنها تبقى عبارة عن شاشة كاملة و اخدة الموبايل كله وده طبعا عن طريق حلول مختلفة لمشكلة الكاميرا الأمامية زى النوتش و الكاميرا الPop-Up و السلايدر و الخرم فى الشاشة بس داخليا تحس ان الحلول ديه كانت كلها حلول مؤقتة لحد ما يوصلوا لحل أحسن لأن كل الحلول ديه أكيد فيها شوية تنازلات النوتش شكلها قبيح ميتهيأليش فى حد بيحب شكل النوتش و ال Mechanical Slyder بتمنعك من وجود Rating قوى لمقاومة الغبار و الماء و طبعا فى قلق من وجودأجزاء متحركة فى الموبايل و أخيرا الثقب فى الشاشة بيبقى واضح وواخد جزء من الشاشة و لو بتلعب لعبة أو بتشوف فيلم هيكون فيه عندك جزء متاخد من الشاشة
طبعا الحل المثالى بالنسبة لكل الناس ان الكاميرا الأمامية تختفى جوه الشاشة تكون موجودة تحت الشاشة من غير ما نشوفها و فى نفس الوقت تقدر تصور عادى جدا وقت ما تحتاج انك تستخدمها و الكلام ده بصراحة بنسمع عنه أساطيرمن زمان لكن ما حدش فعلا وصل لحل فى النقطة ديه
وSamsung قالت من فترة انها شغالة فعليا فى حاجة زى ديه وبصراحة توقعنا ان الخطوة دى تيجى من سامسونج لأنها ملكة الشاشات
لكن النهاردة ظهر فعليا أول كاميرة موبايل أمامية موجودة تحت الشاشة و بتشتغل فعليا لكن مش من Samsung لكن من Oppo
oppo نزلت فيديو على تويتر بيوضحلنا فعليا التكنولوجيا الجديدة ديه
الفيديو مدته قصيرة جدا و الجودة بتاعته مش قوية و لكنه كافى انه يوضح الفكرة
الفيديو ظاهر فيه موبايل مش معروف هوا ايه بالظبط و محطوط جوا Cover غريب و الشاشة فيه Full مفيهاش نوتش ولا ثقب ولا حاجة و عليها صور شغالة مغطية الشاشة كلها و بمجرد ما اللى بيستخدم الموبايل بيحول على الكاميرا الأمامية مش هتعرف هيا فين بالظبط فى الشاشة لكنها بتشتغل فعلا و بتصور الحاجة اللى فوقيها و كمان الشخص ده بيحرك ايده ويجيبها فوق الجزء العلوى من الشاشة اللى مفيهوش أى مكان لكاميرا و المدهش ان ايده بتظهر فى الصورة وده معناه ان الكاميرا تحت طبقات الشاشة
و بكده أوببو فعليا هيا أول شركة بتعرض على الأقل موبايل شغال فعليا معا كاميرا موجودة تحت الشاشة و الشاشة مفيها فتحة وشغالة عادى جدا فوق الكاميرا
على تويتر كل اللى اتقال بس استعد انك تنبهر وحاجات كده حماسية لكن على موقع ويبو و هوا موقع صينى نائب مدير شركة أوببو قال ان التكنولوجيا ديه لسه مش هتديك نفس الجودة اللى بتديهالك الكاميرات الموجودة دلوقتى و هتلاقى ان الجودة بتاعة الكاميرات أقل شوية و بيقول ان زى أى تكنولوجيا جديدة أكيد مش هتبقى مثالية من أول محاولة ولكن ديه طبعا بداية كويسة جدا
السبب المنطقى طبعا ان الجودة بتاعة الصورة أقل من الكاميرا العادية الموجودة دلوقتى ان الشاشات الأموليد موجودة تحت طبقات و الكاميرا هتبقى موجودة تحت الطبقات ديه و طول ما الشاشة شغالة الطبقات ديه هبقى شغالة لكن وقت ما تحب تاخد صورة الشاشة هتطفى البيكسلات اللى فيها بحيث تكون شبه شفافة قدام الكاميرا و مش هتكون شفافة تماما بس تكشف اللى قدامها وعشان كده الصورة بتطلع مش نقية و مش صافية تماما زى الكاميرات العادية اللى قدامها قزاز شفاف
الغريب بقا في الموضوع ان معداش وقت ولقينا خبر نازل مباشرة يمكن بعديه بدقايق ان Xiaomi بتعلن عن أول موبايل بكاميرا موجودة الشاشة وتحس ان الشركتين كانوا متفقين مين الليه هيقول الأول و التانى وراه على طول
و على تويتر برضه مدير شركة شاومى نزل فيديو فيه بنت ماسكة موبايلين واحد فيهم واضح جدا انه ال Mi 9 معا النوتش المعروفة ال WaterDrop اللى فيها الكاميرا الأمامية و الموبايل التاني مفيهوش أى نوتش تماما و برضه زى أوببو واضح ان الشاشة Full مفيهاش أى فتحات ولا أى مكان واضح فعليا للكاميرا الأمامية و بعد كده البنت اللى ماسكة الموبايل بتشغل الكاميرا الأمامية و بتشتغل ومبتبقاش شايف برضه هيا فين الكاميرا رغم ان في صورة واضحة فى الموبايل و كمان البنت بتاخد سيلفى عادية جدا وباين ان ال Quality كويس وبس بينتهى الفيديو
اذا الشركات قدرت بطريقة ما انها تطلعلك جودة مظبوطة من الكاميرا الأمامية رغم وجودها تحت الشاشة فأكيد أول موبايل هينزل فعليا معا التكنولوجيا ديه ممكن يكسر الدنيا لأن 100% هو ده المستقبل و ده اللى هيقضى تماما علىالنوتش بجمي أشكالها وهيقضى كمان على أى أفكار سلايدر وأى كاميرات Pop-Up و أى أجزاء متحركة لأن خلاص مش هنبقى محتاجين كل الكلام ده