Nokia X71 ابداع نوكيا
شركة نوكيا بتحاول من جديد انها ترجع تانى للمنافسة بعد فترة كانت مشاركتها قلت بنسبة كبيرة وده بسبب تطور السوق وزيادة التحديثات فى الأجهزة واستخدام تكنولوجيا جديدة الا ان نوكيا مقدرتش تتأقلم معا الوضع الجديد ولقينا شركات كتير ظهرت بقوة زى شاومى وأوببو بس نقدر نقول ان الكلام ده انتهى ورسميا نوكيا بتستيقظ وتعود من جديد
وبصراحة جهاز X71 يعتبر من الفئة المتوسطة بمواصفات الفئات الفلاج شيب ومن رأينا انه فعلا يعتبر أحد نقط التحول فى شركة نوكيا وممكن ترجع زى ما كانت وخصوصا اننا بنشوف مميزات كويسة فى الموبايل زى طبعا ان الخامات المستخدمة من الزجاج معا اطارات من الألومنيوم مش مصنوع من البلاستيك زى أجهزة كتير وده طبعا بيديله قيمة أعلى وبيخلى منظره Premium أكتر وكمان الشاشة 6.39 انش من نوع IPS LCD بدقة 1080X2316p بكثافة 400 بيكسل لكل انش و الحاجة المميزة فى الشاشة ديه هوا وجود خرم فيها عشان الكاميرا الأمامية وديه تعتبر خطوة ممتازة من الشركة انها تنفذ الفكرة ديه وتبعد عن النوتش أو الحواف العادية و كنا شفنا الفكرة ديه فى موبايل زى Honor View 20
و الموبايل بيدعم تركيب شريحتين اتصال و بييجى بنسخة أندرويد Pie 9.0 بواجهة Android One
كاميرات الموبايل الخلفية بتكون 3 كاميرات الأولى 48 ميجا بيكسل بفتحة عدسة F1.8 و التانية 8 ميجا بيكسل بتصور UltraWide و الكاميرا الأخيرة 5 ميجا بفتحة عدسة F2.4 بتشتغل Depth Sensor وطبعاالكاميرات بتدعم HDR وبتدعم فلاش ليد مزدوج
أما بالنسبة للكاميرا الأمامية فبتكون كاميرا واحدة 16 ميجا بيكسل بفتحة عدسة F2.0
المواصفات الداخلية للجهاز كويسة جدا وشركة نوكيا بتقدم مستوى كويس جدا كأداء و المعالج بيكون من نوع Qualcomm Snapdragon 660 و المعالج الرسومى بيكون Adreno 512
و الرامات بتكون 6 جيجا بايت معا مساحة تخزينية 128 جيجا بايت ومش بس كمية الأرقام العالية ديه لأ كمان ممكن تضيف كارت ميمورى يعنى بصراحة نوكيا أبدعت فى الحتة ديه ومبخلتش خالص
وبالنسبة للبطارية فسعتها هتكون 3500 ميللى أمبير وبتدعم الشحن السريع بقدرة 18 وات وطبعا مش محتاجين نقول انها اضافة هايلة و البطارية سعتها كبيرة بس اللى لازم نتكلم عنه هوا منفذ الشحن اللى هيكون USB Type C !!!!!
طبعا فيه اضافات جميلة فى الموبايل زى طبعا وجود راديو و منفذ سماعات 3.5 ميللى وبصراحة الميزتين دول اختفوا فى موبايلات كتير معا انهم مفيدين جدا لكتير من المستخدمين وطبعا هيبقى فى بصمة فى ضهر الموبايل
بس لو هنتكلم بصراحة عن الموبايل يبقى نقدر نقول ان الموبايل ده تحفة بكل المقاييس خصوصا ان مكانش فيه حد يتنبأ برجوع نوكيا تانى وكتير مننا قالوا انها انتهت لكن نوكيا بتفاجأنا بمواصفات عالية جدا وتصميم جميل و خرم فى الشاشة لأ وكمان منفذ USB Type C ده لحد كده أكبر خطوة نوكيا خدتها عشان تواكب التطور الرهيب
وسعر الموبايل تقريبا 390 دولار يعنى ما يعادل 6760 جنيه مصرى