Xiaomi Pocophone F2 مواصفات ومميزات

الموبايل الرهيب Xiaomi Pocophone اخيرا نزل منه نسخة جديدة ال F2 النهاردة هنتكلم عنه بالتفصيل 

زى ما تكلمنا عن Pocophone F1 واللى قلنا عليه قاهر الفلاج شيب دلوقتى هنتكلم عن النسخة الاجدد منه و ده بعد التسريبات اللى نزلت عنه وطبعا الاصدار السابق اللى كان فى 2018 كان نجح نجاح كبير جدا ويعتبر حالة خاصة من حالات الموبايلات عشان تقريبا هوا ملوش تصنيف عشان بييجى بمواصفات فئات عالية والسعر من الفئة المتوسطة وكان يعتبر فلتة او حالة استثنائية والمرادى الابداع مستمر معا النسخة الجديدة F2

نبدأ معا التصميم

الموبايل بييجى بشاشة 6.3 بوصة وطبعا ديه اكبر من النسخة اللى فاتت F1 وهييجى من نوع IPS بدقة Full HD نفس ال F1 ولكن المختلف ان النوتش واللى كان كبير وعامل مشكلة فى النسخة القديمة دلوقتى التسريبات بتقول ان الموبايل هييجى بنوتش صغيرة وهييجى بنفس جودة التصنيع زى ال F1 واللى هوا الضهر من البلاستيك برضه للأسف مش قزاز ولا معدن 

بالنسبة للمواصفات الداخلية 

 الموبايل بييجى بالمعالج الخرافى Snapdragon 855 واللى لغاية دلوقتى يعتبر من احسن المعالجات فى العالم واللى فى القدرة انه يخفض استهلاك البطارية بشكل كبير وطبعا اعلى من المعالج الSnapdragon 845 اللى فى ال F1

كمان الموبايل بييجى برامات 8 جيجا بايت و 10 جيجا بايت ومساحة داخلية 64/128/256 جيجا بايت وطبعا الفرق واضح عن ال F1 اللى كان برامات 6 جيجا ومساحة داخلية 64 جيجا بايت وكمان الموبايل بييجى بشريحتين وامكانية وضع كارت ميمورى مكان الشريحة التانية وللأسف الموبايل مبيدعمش شبكة الجيل الخامس

وبالنسبة للكاميرات 

الموبايل بييجى بكاميرات خلفية 12 ميجا بيكسل و 5 ميجا بيكسل زى ال Poco F1 بالظبط وبرضه نفس الخواص فى الكاميرات زى HDR و التفاصيل الواضحة وبرضه الكاميرا الامامية 20 ميجا بيكسل وبكده يبقى الموبايلين متشابهين جدا فى الكاميرات بس لسه مش عارفين هل نفس العيوب فى التصوير بالليل هتبقى موجودة فى الموبايل الجديد ولا لأ بس نتمنى انها تكون اتحلت فى النسخة الجديدة

اما بالنسبة للبطارية 

البطارية هتكون بسعة 4000 ميللى امبير وبرضه بتدعم الشحن السريع زى ال Poco F1 فميعتبرش فيه اختلاف فى البطارية بين الجهازين وطبعا ال USB Type C

الاختلاف هنا فى المعالج الاعلى واللى زى ما قلنا بيقلل من استهلاك البطارية 

اخر حاجة واللى زى ما فئة Pocophone عودتنا عليها هيا السعر واللى دايما بيبقى الميزة الاكبر فى الموبايل واللى بتخليه حرفيا ملوش تصنيف اذا كان فئة عالية بسبب المواصفات ولا فئة متوسطة بسبب السعر واللى اكيد طبعا هيكون مفاجأة ونتمنى من شركة شاومى انه يكون سعر متوسط زى Pocophone F1 بس طبعا لسه السعر متحددش ولكن بنتوقع انه ميكونش فى حدود الاسعار العالية وطبعا الموبايل فيه كل المميزات الموجودة فى النسخة القديمة زى بصمة الوجه و السماعات ده غير ان فى المستقبل نتمنى ان Xiaomi تصنع الموبايل بضهر قزاز بدل البلاستيك عشان بصراحة الموبايل رهيب جدا وامكانياته عالية لكن الضهر البلاستيك بيدى نفس الاحساس انه رخيص ومش موبايل Premium  

وللمزيد من الاخبار المتعلقة بالتكنولوجيا تابعونا من هنا