Xiaomi Pocophone F1 الموبايل الفلتة من شاومى
هنتكلم النهاردة عن كل مميزات وعيوب الجهاز الخطير من شاومى واللى يعتبر قاهر اجهزة الفلاج شيب بامكانياته العالية وسعره الرخيص جدا بالنسبة للموبايلات الفلاج شيب الغالية
اولا المميزات
اول ميزة هنا فى الموبايل هيا الاداء
خصوصا انه بييجى بالمعالج الخرافى Snapdragon845 واللى هوا طبعا بينزل فى الموبايلات العالية ال Flagship زى Samsung S9 و Note 9 وتقريبا فى كل فلاج شيب سعره معدى ال 15 ألف جنيه وطبعا دى اكبر ميزة ممكن تلاقيها فى موبايل مش من الفئة العالية أو بسعر متوسط
كمان الرامات ال6 جيجا بايت و ال 64 جيجا بايت زاكرة داخلية و كمان هنلاقى ان الاداء أفضل اداء ممكن تلاقيه فى العالم كمان مش بس فى الفئة الخاصة بيه وده طبعا عشان زى ما قلنا ان المعالج من اقوى المعالجات الموجودة وكمان الرامات ال6 جيجا تعتبر اضافة ممتازة جدا وبتخلى الجهاز ادائه قوى وسريع
ثانى ميزة هيا البطارية
الموبايل بييجى ببطارية بسعة 4000 ميللى امبير وكمان بتدعم الشحن السريع من خلال USB Type C وكمان ممكن توصل ل 10 ساعات وتلت من وقت عمل الشاشة واللى هوا الحقيقة رقم ممتاز وخرافى جدا ان موبايل يوصل لل 10 ساعات متواصل و وقت فعلى للجهاز وكمان الموبايل بيشحن من صفر ل 100 فى ساعتين الا تلت وطبعا ده رقم ممتاز جدا وده بفضل خاصية الشحن السريع
و الميزة الثالثة هيا الكاميرات
الموبايل بييجى بكاميرتين خلفيتين الاساسية بدقة 12 ميجا بيكسل و التانية ب 5 ميجا عشان العزل وكمان بييجى بكاميرا امامية 20 ميجا بيكسل وبصراحة الكاميرات فى النهار هتديك صورة ممتازة جدا و التفاصيل هتبقى واضحة و ال Dynamic Range خرافى فى الموبايل وفيه خاصية ال HDR اللى لو فعلتها هتلاقى ال Dynamic Range ممتاز جدا بمعنى انك مش هتلاقى حتت فاقعة فى الصورة او حتت غامقة جدا و الصورة هتبقى متساوية الحتت الفاقعة مظبوطة والغامقة مظبوطة برضه ونفس الكلام طبعا فى الكاميرا الامامية و خاصية العزل فى الموبايل ده ممتازة جدا وبتقص الاطراف للشخص اللى انتا بتصوره بشكل ممتاز جدا وبتعزل الخلفية عنه فبصراحة الكاميرا ممتازة جدا ولكن هنتكلم عنها مرة تانية فى العيوب
والمميزات الاضافية
طبعا بصمة الوش او ال Face ID واللى بتخليك تقدر تفتح الموبايل ببصمة وشك بمجرد انك ما تقرب وشك الجهاز بيفتح على طول وكمان الموبايل بيتميز بالموضوع ده عن بقيت الموبايلات اللى فيهم الخاصية ديه بأنه ليه Sensor IR مخصوص وكاميرا مخصوصة اصلا لفتح الجهاز ببصمة الوش كمان البصمة الخلفية سريعة جدا وتعتبر من اسرع البصمات اللى ممكن نلاقيها كمان من المميزات ان السماعة Stereo واللى تعتبر اضافة ممتازة جدا وبتخليك تسمع الصوت من اليمين او الشمال لو بتتفرج على فيلم مثلا وقالب الموبايل على الجنب وبصراحة شاومى مستخصرتش خالص فى مميزات الجهاز
ديه كانت المميزات الخاصة بال Pocophone F1 وطبعا لسه متكلمناش عن الشكل و التصميم و الشاشة لأن الجهاز متاح بقاله فترة و حبينا نتكلم عن المميزات اللى مش هتظهر للمشترى غير بعد فترة من الاستخدام او تجربة الاستخدام الكاملة للموبايل وطبعا رغم ان الجهاز جبار ومميزاته كتير جدا
لكن اكيد ليه عيوب وهنتكلم عنها بالتفصيل
اولا:
الموبايل بييجى من البلاستيك واللى تعتبر ميزة انها بتحافظ على الموبايل ضد الكسر وبتزود الامان ولكن فنفس الوقت تعتبر عيب عشان البلاستيك مبيديش احساس ان الموبايل غالى او موبايل ليه قيمة ومش Premium اوى والغريب ان دايما شاومى بتعمل اجهزتها من المعدن و شئ نادر انها تعمل موبايل من البلاستيك وده يمكن عشان سعره القليل نسبيا بالنسبة لبقيت المميزات واللى هوا 6600 جنيه
تانيا:
تصميم الجهاز يعتبر الى حد ما من العيوب لأن الشاشة بتيجى بحجم 6.1 بوصة ومن فوق موجود النوتش واللى مفروض وظيفتها تقليل حواف الشاشة ولكن الغريب ان هنا فيه نوتش وفيه كمان حافة فوق النوتش !!!!؟
واللى هيا لغاية دلوقتى ملهاش تفسير ليه حافة وأصلا وظيفة النوتش تقليل الحواف طبعا الحافة صغيرة مش كبيرة ولكن ملهاش اى داعى ده غير ان الحواف من تحت كبيرة شوية وده ممكن يعتبر عيب ويخلى منظره من قدام مش لطيف او مش جذاب وممكن ما تعتبرش عيب اوى بس بالنسبة لبعض الناس مش هيفضلوا وجود حواف
ثالثا :
الكاميرات بالليل بصراحة عكس النهار بكتير وبتفقد تفاصيل كتير فى الصور وتفقد كتير فى الاضائة اينعم مفيش Noise كتير ولكن برضه بتفقد كتير من المميزات بالليل خصوصا ان فى موبايلات فى نفس الفئة السعرية او ارخص وبتدى كاميرا افضل فى الليل بس طبعا الموبايلات ديه مبتجيش بالمعالج ده ولا البطارية ديه ولا المميزات التانية اللى بتخلى برضه الموبايل ده افضل منهم
رابعا :
وهيا عيب فى ال Software بتاع الجهاز ويعتبر عيب رخم وملوش حل وهوا ان تحت النوتش فيه مساحة صغيرة المفروض انها للاشعارات ولكن فى وجود النوتش مش هتقدر تعرف اذا كان فيه اشعارات ولا لأ غير لما تعمل Swipe للشاشة وتشوف الاشعارات بنفسك وديه حاجة رخمة جدا خصوصا انك ممكن تستخدم الموبايل عادى واول ما تبص على ال Notifications ممكن تلاقى اشعارات كتير من غير ما تعرف يعنى لازم كل دقيقة تسحب الشاشة وتشوف فى اشعار ولا لأ
كمان حاجة رخمة جدا ان البطارية ما بتظهرش هيا كام فى المية غير لما بتنزل شريط الاشعارات يعنى مفيش نسبة البطارية فى الشاشة عادى بس موجودة جوا الاشعارات وطبعا ديه كلها عيوب سوفت وير ولكن تعتب حاجات رخمة او ممكن تضايق المستخدم وبرضه ملهاش اى داعى من وجودها
خامسا :
ممكن تحس ان الشبكة فى الموبايل ضعيفة او الشرط بتاعة الشبكة غالبا ضعيفة ولو قارنته بموبايل جنبه فى نفس المكان هتلاقى اقل دايما فى الشبكة وطبعا ده مش عيب كبير خصوصا انه مش هيفصل شبكة او حاجة ولكن الشرط بتاعة الشبكة مش بتكون قوية ولكن حبينا نذكر الموضوع عشان لو فيه حدا ممكن يعتبره عيب
بس وبكده نكون خلصنا كل مميزات وعيوب الموبايل الرهيب Pocophone F1 واللى تقريبا مميزاته مغطية على عيوب القليلة جدا واللى حبينا نذكرها رغم انها مش عيوب كبيرة عشان ممكن بعض المستخدمين يقضلو عدم وجود العيوب دى ولكن يظل الموبايل متسيد فئة الموبايلات المتوسطة وبرضه مميزاته جبارة بالنسبة لسعره 6600 جنيه وبصراحة الموبايل هيديك كل حاجة نفسك فيها فى الموبايلات ال Flagship رغم انه مش فلاج شيب ولكن يظل منافس شرس ومواصفاته جبارة وبصراحة بنرشح الموبايل ده لكتير من الناس اللى بيفضلو الفئة السعرية القليلة معا الاداء الرهيب
وولمزيد من اخبار التكنولوجيا تابعونا من هنا