انهارده دخلت فيلم غودزيلا godzilla في imax اللي في امريكانا بلازا اكتوبر عايز اقولكوا اننا طول الفيلم فاتحين بوقنا وعامليه هااااه كده زي مابقولكوا الفيلم تصوير واخراج وتمثيل فوق العادي الفيلم بيتكلم عن فكره ان الانسان صعب يسيطر علي الطبيعه مهما كان عنده من اسلحه ونووي ومعدات حرب مش هحرق قصه الفيلم
بس هحكي حته صغيره منه في الاول جايبين منطقه في اليابان حصل فيها انفجار في مفاعل نووي ومات فيه ناس كتير ومنهم زوجه البطل اللي كان بيشتغل في في نفس المفاعل اللي انفجر وكان مش مصدق ومستغرب الهزات الارضيه اللي حصلت وادت لانفجار المفاعل وحكومه اليابان قفلت المدينه خالص ومنعت دخول الناس ليها وبعد ١٥ سنه من الحادث بيظهر العالم ده تاني وهو بيدور علي اسباب الحادثه اللي الحكومه غطت عليها وبيظهر ابنه اللي اتجوز وخلف في امريكا والتحق بالجيش الامريكي واتخصص في تعطيل القنابل النوويه ومكنش راضي عن موقف ابوه وانه مصمم يعرف الحقيقه كامله ومش مقتنع بان الحادث مجرد زلزال طبيعي
الابن بيسافر لابوه عشان يقنعه ينسي موضوع الحادث ويرجع يعيش معاه في امريكا لكن الاب عشان مقتنع بيصمم وبيقنع ابنه يروح معاه مكان الحادث عشان يعرفو الحقيقه
حكومه البلده بتقبض عليهم وهم داخل منطقه الحجر الصحي للمدينه المهجوره وبياخدوهم في منطقه عمل وبيقابلوا العالم الياباني واللي كان محتجز كائن غريب ظهر في مكان الحادث وهو سبب الانفجار اللي حصل من ١٥ سنه وماتت فيه زوجه العالم الامريكي
اثناء وجودهم في المنطقه وهما بيقابلو العالم الياباني اللي كان بيحاول يقضي علي الجنين بتاع الوحش
بيتفاجؤا كلهم ان الجنين بيخرج من البيضه وبيهاجمهم وبياكل اي اسلحه بتقابلو لانه بيتغذي علي اجهزه الطاقه او النوووي طبعا مفيش اسلحه بتنفع معاه خالص
الخبر بينتشر في التلفزيون وكل الناس بتعرف الحقيقه والوحش الصغير بيعمل فوضي في المدينه وبياكل اي حاجه في طريقه
بيكتشفو ان في في منطقه تانيه وحش من نفس النوع لكن انثي وبيحاول الذكر الوصول للانثي للتزاوج ووضع البيض واغراق العالم بوحوش من نفس النوع
الجيش الامريكي بيحاول يوقف الوحشين قبل التزاوج ووضع البيض لكن بيفشل
واخيرا بتظهر غودزيلا godzilla وحش الوحوش وهو بطل الفيلم اللي بيقتل الوحشين الاشرار ويحافظ علي المدينه وعلي سكان العالم من الهلاك وبترجع غودزيلا تاني للمحيط مكانها الاصلي وسط اندهاش من العالم كله من موقفها تجاه الوحشين الاشرار
حسيت ان امريكا عايزه توصل رساله للعالم انها برضو الاقوي في مش بس بالاسلحه والقوي الرأسماله لا ده كمان الطبيعه بتساعدها علي كده وبتقف جنبها ضد اي خطر بيهدد سكانها كمان بتغيير في التاريخ وبتشيل فكره ان اللي حصل في هورشيما ونجازاكي كان برضوا نتيجه طبيعيه اثناء محاوله القضاء علي الوحش مش قنبله نوويه
الغريب اني وانا خارج وفي دماغي الرسالتين دول لقيت ان معظم الناس اللي كانت بتتفرج علي الفيلم بتقول نفس التعليقات ففهمت ان هي ديه رساله امريكا للعالم واللي كلفتها فيلم ب ١٦٠ مليون دولار
لو عجبك الموضوع اعمل شير