Realme 3 Pro تجربة استخدام أرخص موبايل بيشغل فورتنايت
Not allow reviews
تجربة استخدام الموبايل بالكامل معا شرح مواصفاته ومميزاته وتجربة الألعاب عليه
Descriptions
موبايل قوى جدا وناس كتير مستنياه لأنه بيقدم امكانيات كويسة جدا بالنسبة لسعره و كنا عملنا Review كامل عن الموبايل ممكن تشوفوه من هنا
طبعا شركة ريلمى للى ميعرفهاش هيا شركة تابعة لأوببو و أى حاجة بتعملها أوببو بتعملها ريلمى و أى حاجة بتعملها ريلمى بتعملها أوببو يعنى هما هما شركة واحدة ولكن ريلمى تابعة لأوببو اللى تعتبر الشركة العلامة الأكبر
أول حاجة هنتكلم عنها فى الموبايل و اللى الناس أصلا مستنياه علشانه هيا المعالج و اللى هيكون Snapdragon 710
و ده تقريبا هيكون أرخص موبايل بالمعالج ده بحيث ان نسخة ال 4 جيجا بايت رام و 64 جيجا بايت ذاكرة تخزين داخلية غالبا هتكون فى حدود 4500 جنيه و النسخة التانية 6 جيجا بايت رام معا 128 جيجا بايت هتكون ب 5500 جنيه أو حاجة فى الحدود ديه
طبعا المعالج ده يعتبر أعلى شوية من Snapdragon 660 كأداء وفتح برامج و التعامل الطبيعى اليومى زى تح فيسبوك و ووات ويوتيوب و ما الى ذلك
و لكن المهم جدا فيه هوا المعالج الرسومى أو ال GPU أو كارت الشاشة الخاص بالألعاب و الجرافيكس و اللى هيكون Adreno 616 و اللى هيعلى جدا أرقام الموبايل ده و يعتبر أعلى بكتير من المعالج الرسومى اللى معا Snapdragon 660
و علشان كده الموبايل ده يعتبر أرخص موبايل بيشغل لعبة فورتنايت و ده خبر حلو جدا للناس اللى بتحب اللعبة و اللى أكيد هيكون صعب تنزلها على موبايلات كتير لأن مش كل الموبايلات بتشغلها أكيد وكمان مساحتها كبيرة
اللعبة هتشتغل على ال Medium Settings و كمان ال 3D Quality على أعلى حاجة بدون أى تهنيج أو تقطيع فى الفريمات و اللعبة هتشتغل بسلاسة جدا و برضه لو بتحب ألعاب تانية زى Pubg أو Asphalt 9 هتقدر تشغلهم بسهولة و على أعلى اعدادات كمان
بالنسبة لأداء الجهاز فى فتح التطبيقات مثلا هنلاقى انه سريع جدا ومش هتلاحظ فيه أى مشاكل خالص و مش هتلاحظ فيه أى تهنيج أو حاجة و بصراحة الجهاز سريع جدا و Smooth و سلس وده طبعا علشان الجهاز جاى بأخر اصدار للأندرويد و أخر اصدار لواجهة المستخدم بتاعة أوببو ال Color OS 6 و الواجهة ديه طبعا سلسة جدا وأخف بكتير عن الاصدارات اللى قبلها
و طبعا فى نسختين الموبايل ال 6 جيجا بايت رام و ال 4 جيجا بايت رام هتلاقى منفذ لشريحتين اتصال معا مكان لكارت ميمورى بس أكيد مش هتحتاجه أوى لأن النسختين مساحة التخزين فيهم كبيرة زى ما قلنا
النسخة الأولى 128 جيجا بايت و التانية 64 جيجا بايت
بالنسبة لشاشة الموبايل ده فهيا جاية بحجم 6.3 انش بدقة Full HD Plus من نوع IPS
الحقيقة الشاشة مش هتلاقى فيها أى مشاكل خالص من حيث توليد الألوان بتاعها ومن حيث السطوع
و برضه تحت أشعة الشمس مش هتلاقى فيها أى مشاكل
و كمان حواف الشاشة رفيعة جدا و قريبة شوية من جهاز Oppo F11 و تقريبا نفس الجهاز هوا نفس ال Oppo F 11 بالظبط
الشاشة بتيجى بطبقة حماية Gorilla Glass 5
جسم الجهاز هنا كله مصنوع من البلاستيك الفريم من البلاستيك والضهر كمان من البلاستيك بس الضهر بيلمع و هيحسسك انه من القزاز
و تصميم الجهاز جميل جدا بييجى بلون بيتغير فى الضهر زى مثلا البنفسجى و الأسود ولما بتوجهه للنور بيديك انعكاسات حلوة جدا و شكله طبعا ممتاز جدا
و هنلاقى طبعا الحلقة الدائرية الدهبية اللى بتكون حوالين الكاميرا
بالنسبة للكاميرات هنلاقى ان الموبايل جاى بكامرتين خلفيتين الأولى 16 ميجا بيكسل بفتحة عدسة F1.7 و التانية 5 ميجا بيكسل علشان العزل
و الكاميرا هنا ممتازة جدا و السنسور فيها ممتاز بصراحة و لو جربتها الصبح هتلاقى انها ممتازة وبتيدك تفاصيل فى الصور كويسة و ال Dynamic Range هنا يعتبر من أفضل ال Dynamic Range اللى ممكن تاخده كعادة أوببو
و طبعا خاصية العزل بتتم بشكل ممتاز جدا
بس ده بالنسبة للصبح أما بالليل هتلاقى فى الصور Noise شوية و الصور مبتبقاش بالجودة بتاعتها فى الصبح يعنى ببساطة هيا صورة موجودة ولكن مش بالجودة الخرافية اللى بيطلعها الصبح وده طبيعى جدا فى الفئة السعرية ديه ولكن كنا نتمنى ان الكاميرا تبقى أحسن من كده و ممكن تحديث سوفت وير يحل مشكلة الكاميرا بالليل
و عندنا كاميرا واحدة أمامية بتيجى بدقة 25 ميجا بيكسل بفتحة عدسة F2.0 و الحقيقة ديه من أفضل الكاميرات الأمامية اللى هتاخدها فى الفئة السعرية ديه و هتديك صور ممتازة جدا
ف للى قلقان من ان كاميرات الموبايل ده متديكش صور ممتازة نحب نطمنك انها مفيهاش مشاكل غير اللى ذكرناهم بس غير كده كل حاجة هتكون ممتازة بالنسبالك
و طبعا لازم نقول ان الموبايل بيصور فيديو لغاية دقة 4K و كمان بيصور Slowmotion بسرعة 960 فريم فى الثانية زى ما بنشوف فى فلاج شيب زى +S10
و البطارية بتيجى بسعة 4045 ميللى أمبير و الحقيقة هيا من أحسن البطاريات فى الفئة السعرية ديه مش علشان السعة بتاعتها و لكن علشان ال Software Optimization اللى بتعمله شركة أوببو أو ريلمى فى موبايلاتها
وده بيخلى السوفت وير ما يستهلكش بطارية كتير أوى و بيكون Power Saving
و طبعا الموبايل بيدعم الشحن السريع بقدرة 20W بتقنية ال VOOC 3 وهيا طبعا أعلى تقنية من ال VOOC
و ممكن الموبايل يشحن من صفر ل 60% شحن فى 30 دقيقة بس يعنى لو الموبايل فصل خالص وحطيته فى الشاحن لمدة نص ساعة بس هتلاقى الموبايل بقا 60% و دول مش هيخلصوا بسرعة طبعا لأن البطارية سعتها عالية
الحاجة اللى تعتبر ناقصة هنا هيا ال USB Type C و اللى للأسف مش بتكون موجودة وبدالها منفذ الشحن العادى Micro USB
الموبايل هيفضل شغال معاك لمدة يوم و نص لو استخدمته استخدام عادى و لو استخدمته استخدام تقيل هيقدر يكمل معاك اليوم عادى