Huawei Y7 Prime 2019 مواصفات وسعر
Not allow reviews
علشان تكون أنجح موبايل فى فئتك و الأكثر مبيعا مش لازم تكون الأفضل كمواصفات ديه القاعدة أكدها Y7 Prime 2018 و النهاردة بنراجع خليفته Y7 Prime 2019
ايه اللى يخليك تشتريه و ايه اللى يخليك ماتشتريهوش كل اللى عايز تعرفه عن الموبايل هنقوله وطبعا مميزاته وعيوبه و سعر
Descriptions
علشان تكون أنجح موبايل فى فئتك و الأكثر مبيعا مش لازم تكون الأفضل كمواصفات ديه القاعدة أكدها Y7 Prime 2018 و النهاردة بنراجع خليفته Y7 Prime 2019
ايه اللى يخليك تشتريه و ايه اللى يخليك ماتشتريهوش كل اللى عايز تعرفه عن الموبايل هنقوله وطبعا مميزاته وعيوبه و سعره
أول حاجة عينك هتروحلها هيا الحواف اللى هتكون قليلة جدا حوالين الشاشة معا نوتش صغيرة فوق على قد الكاميرا السيلفى بس و حواف من فوق و الأجناب قليلة معا حافة سفلية كبيرة نسبيا مكتوب فى نصها كلمة Huawei
الضهر بيكون بلاستيك لامع بألوان متدرجة وطبعا البلاستيك معروف بأنه مقاوم للكسر بس مشكلته انه مش Premium خالص و بيخلى الموبايل يفقد قيمته و سهل انه يتخدش
الشاشة بتيجى بحجم 6.2 انش IPS بدقة +HD و الحقيقة هنا ان هواوى بتختار أفضل الشاشات فى موبايلاتها
ألوان الشاشة ممتازة و مريحة للعين و هتحب تتفرج على الفيديوهات عليها
و رغم صغر الحافة العلوية هواوى أبدعت فى التصميم و قدرت انها تحط لمبة الاشعارات المتعددة و مستشعر المقاربة ومستشعر ظبط الصورة الأوتوماتيكى و اللى فعلا ابداع بجد انهم حطوا فلاش حقيقى فى الكاميرا الأمامية فى الحافة الصغيرة ديه
و على ذكر الكاميرا الأمامية فهيا 16 ميجا بيكسل و تعتبر أفضل كاميرا سيلفى فى فئة الموبايل القعلية و بتخليك تشترى الموبايل علشانها لكن مشكلتها ان السوفت وير مفيهوش امكانية عمل عزل بالكاميرا السيلفى ديه خاصية بتهم عشاق السيلفى
اما الكاميرا الخلفية فهيا مزدوجة الكاميرا الأولى بتكون 13 ميجا بيكسل بفتحة عدسة F1.8 و الكاميرا التانية 2 ميجا بيكسل لصور العزل
و الكاميرا الخلفية داعمة للذكاء الاصطناعى للتعرف على مشهد التصوير
و رغم اننا تفائلنا فى البداية ان الكاميرا الخلفية تكون كويسة فى الليل اعتمادا على رقم فتحة العدسة الكويس و لكن الواقع هو العكس لأن الكاميرا بتعانى علشان تعمل Focus على الهدف وتفاصيل الصورة قليلة و التشويش و البكسلة ضيف دائم فى كل الصور و نتمنى ان الأداء يكون قابل للتحسن معا تحديثات السوفت وير ان وجدت
و بالنسبة للسوفت وير هنلاقى ان حاجة غريبة وجود Android Oreo فى موبايل فى 2019 اللى المفروض انه يكون Android Pie و لكن ممكن يكون فيه تحديث ليه
واجهة النظام بتكون EMUI 8.2 و ضايفين عليه ميزة كويسة جدا وهيا ميزة التنقل باستخدام ال Swipe بدل الزراير و بتشتغل بكفاءة ولكن كعادة هواوى فى الفئة السعرية ديه انها مش بتوفر ميزة نسخ تطبيقات التواصل الاجتماعى يعنى مش هتقدر تعمل نسختين من الواتساب أو الماسنجر
الموبايل بيدعم تركيب شريحتين اتصال فى نفس الوقت معا منفذ منفصل لكارت الميمورى وديه حاجة كويسة جدا خصوصا ان الذاكرة الداخلية للموبايل 32 جيجا بايت
أداء الموبايل فى المجمل معا 3 جيجا بايت رام و معالج Snapdragon 450 بقنية تصنيع 14 نانوميتر أفضل شوية من الجيل السابق و فى استخدام البرامج مش هيبقى فى مشكلة فى التقليب من برنامج للتانى و مش هيبقى فى تأخير واضح أو تهنيجات تكرهك فى الموبايل
بس اللى هيبقى غريب شوية هو أداء الموبايل معا لعبة Pubg حتى على أقل دقة وأقل Frame Rate الموبايل بيسقط فريمات أثناء اللعب و ده اللى هيخلى تجربتك للعبة ديه محبطة خصوصا ان نفس اللعبة ديه على أجهزة تانية فيها نفس المعالج كانت أحسن
أما بالنسبة لل Speaker فبيكون في Speaker Mono فى أسفل الموبايل صوته نقى و صوته متوسط مش عالى أوى
و مستشعر البصمة بيشتغل بدقة و بسرعة و تقدر تتحكم فى شريط الاشعارات من خلال المسح على المستشعر من فوق لتحت
و فى ميزة التعرف على الوجه وبرضه بتشتغل لكن أبطأ من البصمة
البطارية بتكون سعتها 4000 ميللى أمبير و طبعا ديه سعة كبيرة وتعتبر تفوق ملحوظ على نسخة السنة اللى فاتت و كمان ممكن تكمل معاك 11 ساعة استخدام فعلى حتى لو بتلعب ألعاب تقيلة
بس مش بتدعم ميزة الشحن السريع ومنفذ الشحن بيكون Micro USB 2.0
و بتشحن بالكامل فى ساعتين وتلت
أخيرا سعر الموبايل بيكون 2700 جنيه لنسخة ال 32 جيجا بايت و 3000 جنيه لنسخة 64 جيجا بايت
الملخص ان Y7 Prime 2019 موبايل بيقدم أفضل شاشة و سيلفى و بطارية فى فئته معا تنازل فى الكاميرا الخلفية و الأداء والخامات الخارجية