موبايل هواوى يستخدم النسخة التجريبية من أندرويد و أخر تطورات مشكلة الشركة

Not allow reviews
أخر التطورات و الاخبار فى أزمة هواوى معا جانب مفرح و جانب سيئ و حقيقة منعها من استخدام واى فاى وبلوتوث و و حظر استخدام كارت ذاكرة خارجى و امكانية تشغيل نسخة أندرويد التجريبية على موبايل هواوى

Descriptions




أكيد طبعا كل الناس بقت عارفة مشكلة هواوى أو على الأقل سمعت عنها بشكل جزئى و اللى تعتبر مشكلة معقدة جدا بعد منع Huawei من التعامل معا الشركات الأمريكية و اللى أثر على هواوى بشكل كبير زى ما شرحنا قبل كده بالتفصيل هنا 
و بعدها الأزمة اتطور وشملت مشاكل كمان فى الهارد وير مش بس السوفت وير اللى كان متمثل فى منعها من استخدام أندرويد ولكن الموضوع اتطور وشمل كمان أجزاء تصنيع الهواتف اللى أصبح فيه مشكلة فى استخدام معمارية التصنيع اللى بتعتمد عليها الشركة وده بسبب ان المعمارية ديه تخص شركة ARM اللى برضه قطعت التعامل معا هواوى واتكلمنا عن التطورات دى هنا 

فى خلال الكام يوم اللى فاتوا حصل شوية تبعات و مستجدات فى الموضوع زى ان هواوى مثلا خرجت بره ال SD Association او التعاون بتاع كارت الميمورى ال SD و اللى أصلا الشركة مكانتش بتستخدمه و عندها ال Nano Memory Card 
و التطورات استمرت بعد كده كمان و هواوى خرجت بره التحالف بتاع الواى فاى ال Wifi Alliance و مبقيتش كمان عضو فى منظمة البلوتوث 
لكن دلوقتى فى تطورات جديدة فى الموضوع و التطورات ديه مقسومة لجزئين جزء ايجابى وجزء مقلق 

خلينا فى الجزء الايجابى 
فى خلال اليومين اللى فاتوا شركة هواوى رجعت تانى لل SD Association و بقت عضو شغال عادى زى ما كانت ومتقالش أساسا ايه السبب اللى خلاها تخرج و المهم كمان اانها رجعت تانى لل Wifi Alliance ورجعت برضه لمنظمة البلوتوث و بقت عضو من تانى فى الحاجات ديه كلها و رجعت الأمور زى ما كانت
طبعا ديه حاجة أكيد كويسة ومطمئنة لكن فى حاجة كمان أحسن من كده 

دلوقتى طبعا كلنا عارفين بعد تأكيدات من شركة Huawei وتأكيدات من شركة Google كمان  ان أجهزة هواوى كلها الموجودة فى السوق دلوقتى أو هتباع قريب كمان قبل فترة السماح ال 90 يوم هتفضل تستلم تحديثات ال Security من أندرويد لكن محدش كان عارف هل الكلام ده ينطبق على التحديثات الكبيرة أو لأ يعنى مثلا نسخة Android 10 Q النسخة الجديدة من أندرويد هل هتنزل على موبايلات هواوى ولا لأ 

العلامات فى النقطة ديه مكانتش مبشرة أوى خصوصا بعد ما جوجل شالت ال Mate 20 Pro الفلاج شيب بتاع السنة اللى فاتت من قائمة الأجهزة اللى ممكن تنزل عليها و تختبر النسخة ال Beta من Android Q 
الموبايل اختفى بشكل مفاجئ من القائمة حطتها جوجل وكان فيها أكتر من 20 جهاز ممكن نجرب عليهم ال Android Q Beta 
ولكن الحاجة الكويسة دلوقتى  المبشرة نسبيا ان ال Mate 20 Pro رجع تانى للقائمة ديه ولو معاك الموبايل تقدر دلوقتى فعليا تنزل عليه نسخة البيتا من أندرويد Q و ديه حاجة كويسة جدا 
و ده مش تأكيد ان أجهزة هواوى الموجودة فى السوق دلوقتى هيوصلها Android Q لما ينزل ولكن أكيد رجوع الموبايل للقائمة يعتبر علامة كويسة و ديه حاجة بتوضحلنا ان ممكن فعلا التحديث يكون لكل الأجهزة الموجودة دلوقتى

نتكلم بقا عن الجانب السلبى 
طبعا المشكلة دلوقتى متركزة ما بين هواوى و الشركات الأمريكية ولكن فيه شركات تانية من أصول مش أمريكية ممكن تقاطع هواوى برضه و ده اللى عملته شركة Soft Bank و اللى تعتبر واحدة من أكبر الشركات فى العالم وهيا طبعا يابانية الأصل كانت بتحضر لدخول ال 5G فى اليابان و قبل المشاكل ديه كلها كانت شركة هواوى مرشح قوى لشركة سوفت بانك عشان تاخد منها معدات ال 5G و تنشر شبكات ال 5G فى اليابان 
لكن دلوقتى و بعد ما المشاكل ابتدت تكبر شوية شركة سوفت بانك أعلنت فعليا انها مش هتاخد المعدات من هواوى و هتاخدها من شركة Nokia و من شركة Ericsson و هواوى أصلا ما تعتبرش داخلة السوق جديد وكانت موردة أجهزة ال 4G لشركة سوفت بانك ولكن المشاكل للى حصلت للشركة خلت سوفت بانك تتجه لشركات تانية 

و كده حتى بره أمريكا الوضع فيه تطورات مش لطيفة لشركة هواوى و نتيجة ان في كذا تطور مش لطيف كده بيحصل الصين قررت انها ترد قريبا بحاجة شبه اللى الشركات الأمريكية عملتها و تقارير و أخبار قوية جاية من الصين بتقول انها بتحط Black List لشركات أمريكية و غير أمريكية اللى الصين هتقطع معاها تماما التعاملات التجارية 

بس الحاجة الأهم من كده أو الكارت الأقوى لدى الصين هوا معادن الأرض النادرة و خصوصا ان أى أجهزة الكترونية موجودة سواء موبايلات أو كمبيوترات أو شاشات أو أى حاجة بشكل عام بيدخل فى تصنيعها بنسب قليلة جدا مواد تعتبر نادرة فى الأرض 
المواد ديه زى السيريوم و النيوديميوم و الاسكانديوم وحاجات كتير تانية 
المواد ديه رغم انه بتستخدم بنسب قليلة جدا لكن ليها تأثير قوى على التطور السريع للتكنولوجيا الموجودة حوالينا و بكميات قليلة جدا المواد ديه بتستخدم فى انها تديك شاشات أداءها احسن أو بطاريات تعيش لفترة أطول أو سماعات صوتها أقوى 
النيوديميوم ده مثلا بيديك أقوى المغناطيسات الموجودة على الأرض و ديه طبعا حاجة مهمة جدا فى كل الأجهزة 

علاقة المواد النادرة ديه بالصين انها بتنتج حوالى 95% من اجمالى انتاج الكرة الأرضية للمواد ديه و رغم وجود المواد يه فى دول تانية زى كندا و أستراليا و أمريكا الا ان أكبر كميات موجودة فى الصين 
بس الأهم من وجود الكميات الكبيرة و اللى يعتبر السبب الرئيسى فى انتاج النسبة الكبيرة ديه هوا صعوبة استخراجها  من الأرض أساسا و المواد ديه بيتم استخراجها من مناجم كبيرة وبتكون أصلا مركبة معا مواد تانية وعلشان يتم فصل المواد ديه لوحدها الموضوع ده بياخد وقت كتير وبياخد كمان تعرض للأشعاع و بياخد ملايين الأطنان اللى بتطلع من المواد السامة سنويا

و علشان كده كل الدول ما عدا الصين سايت موضوع استخراج المعادن ده و الصين تولت المهمة ديه و خصوصا ان العمالة أرخص و هما خبراء فى الموضوع والكميات أكبر بتير من الدول التانية و بيعرفوا يطلعوها بدون ما أى دولة تدخل نفسها فى مشاكل المواد السامة وغيرها 
وهوا ده بقى الكارت القوى الموجود فى أيد الصين و الاخبار اللى جاية دلوقتى من الصين بتاكد فعليا انها بتحضر دلوقتى لقرارات لمنع تصدير المواد النادرة ديه للشركات الأمريكية 

Similar Products

2837723469635184848