Plant Based Diet طريقة جديدة للتخسيس غير الطرق التقليدية

Not allow reviews
طريقة جديدة للتخسيس أو أسلوب حياة جديد هيغير طريقة تفكيرك وهيغير مفاهيم كتير اتعودنا عليها يا ترى الكلام ده صح ولا لأ واللى هيأكدلنا شخصيات مشهورة و ممكن تجرب تحدى ال 21 يوم وتشوف بنفسك

Descriptions


Plant Based Diet 
مفكرتش قبل كده فى انك تجرب طريقة جديدة للتخسيس غير الطرق التقليدية اللى برضه ما بتجيبش نتيجة بصفة دائمة و ممكن تخس شوية وتزيدهم تانى أو مفكرتش أصلا فى أسلوب جديد للحياة ممكن يخليك نشيط ومش بتعانى من أمراض مزمنة طيب لو حصل وفكرت يبقى انتا جيت للموضوع الصح ولو مقتنع انك عايش بصورة صحية ومعندكش أى مشاكل نحب نعرفك بطريقة جديدة ممكن تفيدك أو حتى يكون عندك فكرة عنها 

باختصار
 الموضوع هوا طريقة حياة صحية عن طريق أكل مأكولات نباتية 100% والبعد بصورة تامة عن كل المشتقات الحيوانية والأكل المصنع ورغم ان الفكرة فى حد ذاتها ممكن كتير مننا يعتبروها تفاهة أو مجرد حب للاختلاف الا ان خبراء كتير أكدوا ان فيه أضرار كبيرة لطريقة الأكل اللى أغلب الناس بتتبعها 
و أكيد كلنا بناكل اللحوم باعتبارها من أشهى المأكولات ومقتنعين تماما ان مفيهاش أى حاجة غلط  وممكن لوكنت لقيت نفسك تعبان أومرهق بتجيب السبب لأى حاجة تانية و أكيد مش هتفكر ان السبب هو الأكل و مش هتصدق كده الا اذا فعلا شفت بعينك 

و الدراسات وضحت
 ان فى أمريكا مثلا ثلث السكان بيعانوا من السمنة بما فيهم 12 مليون طفل وفى الوطن العربى فى الوقت الحالى عادات أكلنا اتغيرت و اتجهنا  عل لل Junk food  بصورة أكبر وده اللى خلى الوطن العربى أكبر منطقة بتعانى من السمنة فى العالم وده غير أمراض القلب والسكر والمناعة و الضعف الجنسى

وطبعا 
كتير مننا جربوا كل حاجة وكتير مننا أو أغلبنا ميقدروش يتخيلوا العيشة من غير أصناف أكل أساسية فى حياتنا زى البيض اللبن و الفراخ و السمك واللحمة وأى أكل معتمد عل الزيوت وبصراحة ده مش ذنبنا لأن اللى مش معروف اننا عندنا ادمان للنوع ده من الأكل الغير صحى 
و رغم ان كلمة أدمان للمأكولات الغير صحية تعتبر كلمة كبيرة الا ان دكاترة كتير أكدوا كده ومنهم دكتور سكوت ستول رئيس قسم العلاج الطبيعى و أعادة التأهيل فى منظمة Coordinated Health Network و طبيب فريق جامعة Lehigh  و المنتخب الأوليمبى الأمريكى للتزلج 
الدكتور ده ليه أبحاث كتير و مؤلفات فى ال Regenerative medicine و متخصص فى علاج الأمراض المزمنة عن طريق تغيير الدايت وطريقة الأكل عموما

دكتور ستول بيقول
 ان الغريب فى موضوع ادمان المأكولات ان السكر و الملح و الدهون بتمل على نفس المستقبلات فى المخ اللى بيعمل عليها النيكوتين و الكوكايين و الميثامفيتامين و لما بناكل سكر أو دهون أو ملح بتحفز نظام فى المخ يسمى Dopamine Reward System واللى ميعرفش يعنى ايه دوبامين 
هوا بمعنى بسيط هرمون السعادة أو مواد كيميائية عند افرازها فى المخ بتؤدى دور رئيسى فى الاحساس بالمتعة والسعادة والادمان 

الشركات المصنعة
 أدركت الموضوع ده من فترة كبيرة وصنعت أطعمة بتسبب ادمان وبتحفزالمنطقة ديه فى المخ بشدة 
وفى دراسات تانية على فئران تم اعطائها جرعات من الكوكايين لحد ما أدمنته و يتم اختبارهم بوضع الكوكايين أو السكر قدامهم فهنلاقى ان 94% من مرات التجارب الفار اختار السكر وساب الكوكايين اللى هوا مدمنه 

و بالنسبة للبشر 
لما بناكل طعام بيحتوى على أى  المكونات ديه هنحس باحساس كويس جدا واننا فى حالة جيدة وبعدها بنحس بأعراض الانسحاب و يبدأ مزاجنا يتغير أو نشعر بالكأبة ومجرد ما نحس بكده بنفتكر احساس تناول أى نوع من المأكولات جربناه قريب وخلانا كويسين يبقا أكيد الارهاق أو التعب هوا السبب أو ممكن انخفاض السكر فى الدم ولازم ناكل تانى  وبمجرد ما ناكل مرة تانية بيحصل نفس الموضوع ونبقى كويسين ويمر الوقت و نتعب تانى ونفكر فى أكل تانى  وده اللى بيدخل الناس فى دائرة خطيرة اننا كل ما نزعل لازم ناكل عشان نبقى كويسين ونفضل على كده لحد ما فى الأخر الموضوع ده يأثر على صحتنا

السؤال بقا ازاى الدايت النباتى Plant Based Diet بيواجه المشاكل ديه ؟؟؟
دكتور ستول بيقول ان النظام الغذائى النباتى هوا حل جميل لمشكلة ادمان الطعام أو الاكل العاطفى اللى هوا زيادة الأكل حسب الشعور 
النظام الغذائى بيحل المشكلة ديه عن طريق ان الألياف بتبطأ من امتصاص الكربوهيدرات واللى مبيخليش كمية السكر المهولة اللى بتأثر على مخنا ونظام المكافأت فيه تدخلنا تانى 
و الألياف بتحتوى على مضادات للأكسدة و المواد الكيميائية النباتية اللى ليها تأثير قوى على الجسم و نسبة الدهون فى النظام الغذائى النباتى بتكون صغيرة من 10% الى 15% من الدهون فى نظام الأكل النباتى بالكامل

 وكمية الدهون القليلة جدا
 ديه ما بتؤديش لتعطيل عملية الهضم ولما بناكل أكل نباتى احنا كده بنحقق التوازن فى الجسم و التوازن فى نظام المكافأت فى المخ 
و بالنسبة للأشخاص اللى بيعانوا من ادمان الطعام ف نظام المأكولات النباتية بالكامل  بالنسبالهم هيعمل على توازنهم الكيميائى العصبى بالكامل فى المخ و الأمعاء وبكده ممكن لأول مرة يقدروا يفكروا بصفاء ووضوح ويشعروا بصحة أفضل 

طيب سؤال تانى ليه مناكلش منتجات اللحوم بس باعتدال ؟؟؟
دكتور سكوت ستول وضح ان مفيش حاجة اسمها أكل لحوم باعتدال ولو بصينا ل اتجاهات البشر فى أكلهم على مدى ال 100 عام الماضية
هنعرف ان فعلا مفيش معايير للنظام المعتدل ففى عام 1890 كان الشخص العادى بيتناول متوسط 2.2 كجم من السكر فى السنة و دلوقتى الشخص العادى بياكل أكترمن 68 كجم سكر فى السنة و فى عام 1900 بيتناول الشخص العادى متوسط 1.8 كجم من الزيت فى السنة أما دلوقتى فبيتناول متوسط 33 كجم فى السنة ونفس الكلام على اللحوم اللى زادت بنسبة 27 كجم و منتجات الألبان اللى زادت أكتر من 13 كجم لكل شخص فى السنة 
ولو قارنا نفسنا بأجدادنا من 100 عام أو 1000 عام هنلاقى ان وجباتنا الغذائية بتختلف اختلافا جذريا عن اللى كان يعتبر معتدل فى الوقت ده 

طيب ايه اللى يخلينا نسيب الأكل اللى متعودين عليه وبناكله طول عمرنا ومبسوطين كده و اتربينا عليه ومعندناش مشاكل ؟؟؟
لكن بصراحة احنا مش مبيوطين أوى وزى الفل فعلا لأن كل كلامنا عن الدايت و الامساك وتكميم المعدة و الارهاق و الحموضة وعسر الهضم و كمية أدوية كتير ما فيش بيت ما بيخلاش منها وبرضه مش بتخلينا زى الفل
طيب نتكلم عن واحد فى بداية الأربعينات عنده مشاكل فى الوزن و نومه وعنده حموضة و امساك وبدايات مرض سكر ببساطة العادى بالنسبة لأى حد و فجأة يغير حاجة واحدة وبقى بيجرى ماراثون ويدخل مسابقات سباحة لمسافات طويلة ويمارس كل أنواع رياضات التحمل ويلقب بأكتر انسان لياقة فى العالم وهوا عنده 50 سنة دلوقتى وصحته بقت أحسن من أى وقت فات اكيد أى حد هيسمع كده هيحب يعرف هوا مين وغير ايه فى حياته

بنتكلم عن Rich Roll
 اللى مجلة Fitness Magazine اختارته ضمن أكتر 25 رياضى لياقة على مستوى العالم و المفاجئ ان من كام سنة بس ريتش كان عنده 45 وكان بيعانى من مشاكل فى السمنة لغاية ما جاتله بوادر أزمة قلبية ووقتها قرر انه يغير نظام حياته و كمان أكله ل Plant Based Diet و النهاردة بعد ما عدى 50 سنة أصبح متخصص فى حاجة اسمها Ultra Endurance Sports بالتحديد ال Iron Man و ريتش هوا البنى أدم الوحيد اللى كمل تحدى Epic Five اللى بيكون عبارة عن 5 أيرون مان فى 5 أيام فى 5 جزر مختلفة فى أقل من أسبوع

 و اللى معيرفش هوا ايه أيرون مان هنقولكم باختصار
مبدأيا أيرون مان ده مش Tony Stark خالص لو انتا بتتابع Marvel  
انما ببساطة شديدة سباحة لمسافة 2.4 ميل وسباق دراجات لمسافة 112 ميل وماراثون كامل لمسافة 26.2 ميل 

طيب تفتكر ريتش بياكل لحمة أد ايه فى اليوم ؟؟؟
ريتش بيقول طول حياتى اتعلمت ان اللحمة للعشاء و اللبن مفيد جدا للجسم ولكن اكتشفت انى كنت أسير لرغبتى فى تناول الأطعمة ديه ومكانتش بقدر أسيطر على نفسى وده اللى خلانى أكمل فى دائرة أكل ما بتخلصش للمأكولات اللى عارف انها مش صحية ليا وبتقلل من طاقتى وبتقودنى للأمراض المزمنة و الحل الوحيد للأدمان ده هوا التوقف التام عن تناول الأطعمة الحيوانية اللى بتغذى الرغبة ديه و من فترة مش بعيدة مكنتش بقدر أطلع السلم من غير ما أتعب وأستريح ونفسى يتقطع كان عندى مشكلة فى التنفس وكنت خايف جدا انى أصاب بأزمة قلبية لأن مرض القلب وراثة فى عائلتى و حاولت انى أجرب جميع الأنظمة الغذائية الموجودة لكن مفش حاجة جابت نتيجة لحد ما جربت نظام 100% مأكولات نباتية وكانت دى أخر محاولة وقولت هجربها وخلاص كده كده مش هتنفع وشوية وهرجع أكل برجر وانا مستريح ولكن اندهشت لما لقيت ان فى خلال 7- 10 أيام من اتباع النظام الغذائى النباتى حسيت ان حالتى اتغيرت وكنت حاسس انى أفضل بصورة لا تصدق 

وكمان قال 
ان احنا ممكن نمنع وكمان نتخلص من الأمراض اللى كنا فاكرين انها مزمنة عن طريق عمل تغييرات بسيطة فى نظامنا الغذائى ونمط حياتنا اليومية وده بيبدأ بالتحويل لنظام غذائى نباتى 
ودلوقتى بقيت باكل كربوهيدرات و فواكه و خضراوات و سلطة بطاطس و بطاطس مخبوزة و رز وفاصوليا و بقوليات ومكسرات وبزور وحبوب كاملة القريبة من حالتها الطبيعية غير مهدرجة قدر الامكان 
طيب ريتش على فكرة مش ها الرياضى الوحيد اللى بيحقق بطولات وهوا على Plant Based Diet  فيه رياضيين كتير زى Venus Williams , David the Hayemaker , Carl Lewis , Kyrie Irving , Colin Keapernick , Nate Diaz, Austin Ares , Patrik Baboumian , Wilson Chandlers 

الغريب ان بعد كل ده الناس هتسأل نفس الأسئلة هنعمل ايه فى فيتامين B12 و الكالسيوم وهنجيب منين بروتين وازاى هنربى عضلات ؟؟؟
الناس فكرة انك لو هتمشى على نظام نباتى يبقى هتاكل خس وجزر بس و الحقيقة ده غلط لأن فيه حاجات كتير هتاكلها هتحل كل المشاكل ديه وهتعوضك عن البروتين والفيتامينات ومش بس فاكهة و خس لأنك ممكن تاكل أكل كتير نباتى وبقوليات هتديك نسبة البروتين اللى تحتاجها و الفاكهة فيها كل الفيتامينات و أكيد محدش ممكن يتعب أو يموت لو جرب ياكل أكل نباتى بس وبعد لمدة 21 يوم عن اللحوم والبيض و الزيت واللبن 

الموضوع ممكن
 يكون صعب بس ممكن تجرب تحدى ال Plant Based Diet لمدة 3 أسابيع بس وهتبتدى تشوف الفرق ادى لنفسك فرصة جرب حاجة جديدة زى ما جربت كل حاجة تانية وبلاش ترفض حاجة غير لما تجربها ومش هتخسر حاجة 




Similar Products

177265358179888380