Realme 2 pro اجمد موبايل فئة متوسطة

Not allow reviews
Pocophone مبدأيا لو الجهاز ده حقق المواصفات المكتوبة على الورق هيبقى احسن موبايل فى الفئة المتوسطة و هيبقى هوا و ال الاختيارين الوحيدين فى الفئة دى وبعيد عن المواصفات الداخلية الرهيبة اللى فى الجهاز ده احنا هنوضح تجربة الاستخدام واللى بيها هنحدد هوا فعلا احسن جهاز فئة متوسطة ولا لأ

Descriptions





هنتكلم عن كل حاجة تخص Realme 2 pro 



مبدأيا لو الجهاز ده  حقق المواصفات المكتوبة على الورق هيبقى احسن موبايل فى الفئة المتوسطة و هيبقى هوا و الPocophone الاختيارين الوحيدين فى الفئة دى


 بس سريعا نعرفكم بشركة ريلمى وهيا شركة تابعة لاوببو بس مش منفصلة عنها زى ما Oppo و Vivo و One Plus كلهم تابعين لشركة واحدة ولكن تحت ادارات مختلفة وكل شركة بتدير نفسها بشكل مختلف ريلمى مش منفصلة عن اوببو هيا تابعة ليه حتى بتستخدم نفس السوفت وير بس حاليا ريلمى بتحاول تسوق لنفسها بشكل منفصل عن اوببو وممكن فى المستقبل ينزلو سوفت وير خاص بيهم بس فى الوقت الحالى التشابه مابينهم ومابين اوببو كبير جدا  و هدف ريلمى انها تنزل براند جديد هو استهداف الشباب واستهداف الفئة اللى بتدور على اعلى قيمة مقابل الفلوس اللى بتدفعها ودى مش سياسة غريبة دى سياسة زى شركة شاومى ولما شاومى نجحت النجاح الباهر ده شركات تانية كبيرة زى Huawei وOppo قررو انهم يعملو براندات تانية تحتهم زىHonor و Realme عشان ينافسو فى الفئة اللى شاومى واقفة فيها لوحدها دى بس ريلمى لعبتها صح تسعيرها ومواصفتها اللى حاطينها واللى مش باخلين بيها تماما فى موبايلاتهم اللى نزلوها حتى الان خلتهم يبقو الشركة الاكثر مبيعا فى الهند فى 6 شهور بس من عمر الBrand وده اللى مخلى في دوشة كبيرة جدا على Realme

 Realme 2 Pro نرجع بقا للجهاز اللى معانا 


جهاز اول ما هتشوفو هتفتكر Oppo F9 ومحدش هيقدر يلومك لأن الموبايلين تقريبا زى بعض من ناحية الشكل الحاجة الوحيدة اللى ممكن تفرق مابينهم بيها ان الضهر فى Realme 2 Pro هتلاقيه اسود وبشوية انعكاسات اما الOppo فكان فيه المثلثات اللامعة وده غير ان الجهاز معبأ بكمية مواصفات غريبة بداية من الشاشة الIPS 6.3 انش الFull Hd Plus الكبيرة جدا باستحواذ اكتر من 80% من واجهة الجهاز و بالنوتش الWater Drop زى بتاع ال F9 

ثم المواصفات الداخلية


معالج Snap Dragon660 ونسختين  للجهاز الاولى ب 4 جيجابايت رام و 64 جيجا ذاكرة داخلية و النسخة التانية 8 جيابايت رام و 128 جيجا ذاكرة داخلية و بطارية 3500 ميللى امبير  والكاميرا الخلفية ال16 ميجا بيكسل بتصور 4k والكاميرا الامامية 16 ميجا بيكسل برضه وقارئ بصمة و Face Unlock 
و تقريبا كل المواصفات اللى تحتاجها وكل ده بكام???
النسخة اللى ب4 جيجا رام ب 4000 جنيه !!!
 والنسخة التانية الى ب 8 جيجا رام ب 5000 جنيه !!!!

 يعنى تسعير رهيب و خيالى بس  مش هنتكلم على المواصفات تانى دلوقتى عشان ممكن المواصفات المكتوبة ممكن تخدعنا فى الحكم على الجهاز ممكن الكلام المكتوب على الورق وال Spec Sheet بتاع الموبايل تعمينا عن تجربة الاستخدام الحقيقية 

 وعشان كده هنتكلم عن تجربة الاستخدام الحقيقية واللى مش هتبان غير بعد استخدام طويل شوية 


بالنسبة للتصميم 


التصميم تقليدى جدا ومفيهوش اى شئ مميز  والموبايل من بلاستيك احساسه مش Premuim خالص 
وكمان المسكة لفترة طويلة متعبة شوية لأن الشاشة منفصلة عن ضهر الجهاز ومسكته حادة شوية وبصراحة الموبايل متين جدا وزى محنا عارفين ان البلاستيك مبيتكسرش بسهولة و فيه قارئ بصمة فى الضهر وسريع جدا و Face unlock سريع جدا جدا 
و الشاشة نفسها كألوان ودقة من افضل الشاشات الموجودة فى موبايلات الفئة المتوسطة الالوان مشبعة بس مش اوفر فى التشبع يعنى مش مفرقعة مثلا والContrast ممتاز على الIPS 

بالنسبة لتجربة الاداء


الموبايل سريع والفضل يرجع للسوفت وير الممتاز بتاع Oppo واللى فيه الامور بسيطة وسلسلة وكمان مش بيضغط على مواصفات الجهاز ولا بيتقل الجهاز زى الSoft Wares التانية زى ال EMUI او سوفت وير سامسونج اللى بيبقى على الموبايلات الاقتصادية  اللى بيبقى تقيل جدا والتقل ده مش هتلاقيه هنا حتى مفيش Animations معقدة هتلاقى فيه بس بسيطة المشكلة الوحيدة اللى ظهرت هيا الSwipes او طريقة التنقل بدون اللى بتستبدل الزراير اللى على الشاشة هنا بتهنج سنة بس مش اوى بس لو رجعت للزراير اللى على الشاشة هتلاقى ان مفيش اى تهنيج خالص ومش هتاخد تجربة اداء افضل من كده غير فى الموبايلات الFlagship 

وبالنسبة لتجربة الالعاب 


هنلاقى ان الجهاز بيقدم تجربة العاب ممتازة ممكن تشغل لعبة Pubg على ال High Sittings و شغالة كويس تقريبا 30 frame/s بس لو عايز سلاسة فى اللعب ممكن تقلل الجرافيكس شوية وحتى لو لعبت على اعلى جرافيكس اللعبة مش هتهنج ولا الموبايل هيسخن ولا حاجة 

الحاجة اللى ممكن تعتبر سلبية هيا الRam Management 


 وبرغم ان حتى لو جبنا النسخة ال 8 جيجا بايت رام الا ان الجهاز ممكن ميتحملش يفتح 4 برامج معا بعض مش عشان الجهاز ميقدرش يعمل كده بس علشان خاصية موجودة فى الBattery Sittings اسمها Smart Power Saving لما بتبقى الخاصية دى شغالة بيقفل اى برنامج مبتستخدموش كتير يعنى لو سبته مفتوح ومعلمتش على البرامج اللى بتستخدمها بأنك تدخل على الRecent APPS وتسحب لتحت كل برنامج انتا بتحبه زى مثلا Facebook ,Youtube وكده وتدوس على Lock او علامة القفل اللى فوق ديه عشان تخلى الرام متتحكمش فيه ويفضل مفتوح فى الخلفية  فلو معملتش كده كل البرامج المفتوحة فى الخلفية هتتقفل زمش هيفضل غير اخر برنامج بس مفتوح او اخر اتنين بس ما ننصحش انك تدخل على وتقفل خاصية ال Smart Saving  عشان كده كل البرامج هتبقى مفتوحة ومفيش اى مشاكل ولكن اداء البطارية هيقل جامد اوى فاحنا بننصح انك تفضل سايب الSmart Saving شغال ولكن تعلم على البرامج المهمة اللى عايزها تبقى مفتوحة فى الخلفية بس بحد اقصى 3 او 4 برامج مش اكتر وبكده تبقى حافظت على البرامج اللى بتحبها وعلى استهلاك البطارية لأن بسبب الميزة دى الموبايل بيعد معاك اليوم كامل بدون اى مشاكل وبلاش تثبت عدد كبير من البرامج عشان الجهاز هيضطر يقفلهم برضه وعمر البطارية وادائها هيقل 
وللاسف الشحن يعتبر بطئ شوية يعنى ممكن يتشحن فى ساعتين او ساعتين وربع وعشان تلاقى شحن سريع من استايل الموبايلات ديه مش هتلاقى غير ال Oppo F9 

وبالنسبة للكاميرات 


الكاميرا الخلفية 16 ميجا بيكسل زمعاه كاميرا تانية 2 ميجا بيكسل عشان العزل والصور العادية من الكاميرا ديه ممتازة فى توزيع الاضاءة الممتاز و ال Dynamic Reach وصور Sharp اوببو او ريلمى هنا من اكتر الشركات اللى بتعرف تظبط الHDR وتوزيع الاضاءة فى الصور وخاصة الموبايلات اللى فى الفئة السعرية القليلة ومفيش حتت بقا تبقى مضلمة او الظل مفرقع اوى او الاضاءة العالية ملسوعة مفيش كده بس فيه حاجة واضحة جدا ان السينسور اللى هنا اقل من الموجود فى الF7 او F9 وده بنلاحظه  لما السينسور بيحاول يوزع الاضائة بشكل متساوى على الصورة كلها ويعلى الحتت المضلمة هيبتدى الNoise فى الShadows يبان اوى ال Shadows فى الموبايل ده بتبقى Noisy اوى ومنغمشة بشكل كبير كمان الصور فى الاضاءة الضعيفة بتبقى اقل شوية من F7 و F9 والدنيا بتبقى Noisy ولما بيحاول يقلل الNoise بقدر الامكان التفاصيل بتروح وبتبقى الصورة Soft 
لكن الوضع هيتغير هنا معا الكاميرا السيلفى لانها ممتازة جدا و Sharp جدا والDynamic Range زى بالظبط اللى فى الكاميرا اللى ورا والالوان حلوة جدا بصراحة كاميرا سيلفى ممتازة وهو موبايل متكامل معا انه ممكن يكون مش احسن كاميرا فى سعره ممكن موبايلات تانية تقدم كاميرا احسن منه بس هنا هتاخد تجربة متكاملة اكتر ومش هتشتكى من الكاميرا ومنقدرش نعتبر فيه اى تضحيات  يعنى اداء خرافية وبطارية خرافية ممكن مش احسن بطارية بس بالمميزات الموجودة فيها ممكن تعد يوم شغالة من غير اى مشكلة ده غير الشاشة الضخمة والالوان الممتازة وكاميرا سيلفى هايلة جدا فمنقدرش نعتبر ان الكام عيب البسيط يخلونا نضحى بكل المميزات دى قصاد كاميرا احسن شوية 


فبصراحة نقدر نقول ان الموبايل ده افضل موبايل نزل فى الفئة المتوسطة ويعتبر ملوش منافس غير مثلا Honor 8 x واللى بنفس السعر وبييجى ب4 جيجا رام بس مش 8 وطبعا تجربة الاستخدام فى Huawei و Honor السوفت وير بطئ وبيعلق وده اللى مش هتلاقيه هنا فى ريلمى والمنافس التانى مثلا شاومى ريدمى نوت 6 واللى برضه مفيهوش استحواذ الشاشة الكبير وهنا الشاشة احلى 
بكتير 

فحقيقى نقدر نقول ان Realme 2 pro ملوش منافس فى فئته


ولأى اخبار تخص التكنولوجيا ادخل هنا 


Similar Products

1600077670822043885